الكويت.. إلغاء صلاة الجماعة رسميا بسبب “كورونا”

علنات وزارة الأوقاف فالكويت بشكل رسمي على إلغاء صلوات الجماعة الخمس ابتداء من اليوم، والاكتفاء بالأذان بوحدو.
هذ القرار خداتو الوزارة بناء على توجيهات الجهات الصحية فالبلاد، وعلى فتوى هيئة الإفتاء بالوزارة، فظل انتشار فيروس “كورونا” المستجد اللي قتل الآلاف عبر العالم.
وقالت الوزارة، فبلاغ ليها، بللي الجوامع فالكوت كلها غادي يكونو سادين، وما على المسلمين منين يسمعو الأذان غير يقولو (ألا صلو في رحال)، بمعنى صليو فديوركم، وهذشي اللي خصهوم يديرو.
وهذ القضية ديال صلو فالرحال كان كيقولها رسول الإسلام فاش كيكون الجو غير مناسب لصلاة الجماعة، بسبب الريح او المطر أو البرد، لكن فهذ الاثناء صبحات الصلا خطيرة جدا بسبب الوباء اللي وصفاتو منظمة الصحة العالمية ب”الجايحة”.
وفالوقت اللي مساجد كبيرة عبر العالم ودول على قدها لغات صلوات الجماعة والجمعة، وزارة الأوقاف المغربية مازال عندها تردد باش تلغيها، ولو غير فالمساجد الكبرى اللي كتجمع كثر من 500 دالبشر، فالوقت اللي جميع الانشطة الثقافية والرياضية تلغات وتأجلات بسباب الفيروس.