بعدما سيطرات على الفيروس .. الشينوا كتقتارح مساعدة الدول الإفريقية لمحاربة “كورونا”.. ومنها المغرب

الشينوا اليوم الأربعاء عرضات على كَاع الدول الإفريقية، وخصوصا منها اللي وصلها فيروس “كورونا” المستجد ومنها المغرب، باش تعاونها فالمحاربة ديالو، وتعطيهم المساعدات على قدر استطاعتها.
المتحدث باسم وزارة الخارجية الشينوي، كينكَ شوانكَ، قال بللي الشينوا بغات تدير هذشي حيت الدول الإفريقية وقفات معاها فالمحنة ديالها، وعاوناتها حتى استاطعات تتغلب على “كورونا”.
شوانكَ وضح بللي الدول الإفريقية عاونات الشينوا ووفرات ليهم الأموال والمواد اللازمة للقضاء على الفيروس واخا كانت مواد قليلة وجيست بسيط.
وهذ الاقتراح جا بعدما استطعات الشينوا تسيطر على الوضع فبلادها، وقللات من حالة الوفيات والإصابات هذ السيمانة، أمام ذهول دول أخرى اللي ماعرفات راسها باش تبلات، وبانت عاجزة على محاربة “كورونا”، وعلى رأسها الطاليان اللي عدد الإصابات والوفيات عندها كايتزاد كل نهار بالعشرات والمئات.
وبالإضافة لهذشي، الشينوا قررات كذلك تعاون الطاليان، وسافطات ليها عشرات الاطقم الطبية باش تساعدها على محاربة الفيروس.
الشينوا ضصرات وتفرعنات، وجابليها الله هذ الدول محتاجة مساعدتها، فالوقت اللي هي اللي كتتحمل المسؤولية اللولة فانتشار الفيروس فالعالم، بحكم انه ظهر أول مرة عندها، وخلات الرحلات مطلوقة واخا عرفات مدى الخطورة ديالو.