من بعد هروب الطلبة المغاربة منها بسبب “كورونا”.. جامعة ووهان فتحات باب التسجيل للأجانب فالماستر والدكتورا

بعدما ولات مدينة ووهان الشينوية موبوئة بسبب انتشار فيروس “كورونا” القاتل فيها، فتحات الجامعة ديالها، بتنسيق مع وزارة التعليم فالشينوا، باب التسجيل فسلك الماستر والدكتورا للطلبة المغاربة خصوصا والأجانب عموما، وهذشي وعراضات عليهم، ولأول مرة، منحة دراسية ممولة بالكامل.
فالوقت اللي مجموعة من الطلبة الأجانب رجعو بحالهم من الشينوا، وسمحو فالجمل وما جمل، ومنهم المغاربة اللي كيقراو فجامعة ووهان، هذ الجامعة قررات فظل انتشار الفيروس تفتح تسجيل الأجانب، واخا مدينة ووهان دابا ولات معزولة على باقي دول العالم، بل وحتى على الشينوا براسها.
المنحة المالية اللي عرضات جامعة ووهان على الطلبة، تتمثل فالإعفاء الكلي من رسوم التسجيل والدراسة، والإقامة المجانية، ثم منحة شهرية بقيمة 3500 رينمينبي بالنسبة لصحاب الدكتورا (حوالي 4800 درهم)، و3000 رينمينبي بالنسبة لصحاب الماستر (4100 درهم)، فضلا على أنها كتوفر للطلبة التأمين الطبي الشامل.
وبالنسبة لشروط التسجيل فهي ماشي تعجيزية، بل على العكس، غاتكون كتتوفر فأغلب الناس اللي غيتقدمو بطلب التسجيل، واللي كتشترط فيهم فقط مايكونوش مواطنين شينويين، ويكون السن ديالهم مكايتجاوزش 35 سنة بالنسبة لصحاب الماستر، و40 سنة بالنسبة للدكتورا، ويكونوا فصحة جيدة.
وفإعلانها على موقعها الرسمي، جامعة ووهان ماذكراتش حس “كورونا” فمرة، بل بقات تزوق فالسمعة ديالها، وتكلمات على تاريخها وجودة التكوين فيها وكفاءة أساتذتها.