“لارام” حبسات رحلاتها للشينوا بسبب قلة الطلب عليها.. والمغاربة مازالين حاصلين ف”ووهان” وخايفين من “كورونا”

غادي تعلق الخطوط الملكية المغربية “لارام”، ابتداء من يوم غد الجمعة 31 يناير، وإلى غاية 29 فبراير 2020، جميع خطوطها من كازا نحو عاصمة الشينوا، بيكين، والعكس.
وحسب مصادر “كود”، ف”لارام” اتخذات هذ القرار، بعدما عرف الطلب على رحلاتها للشينوا تراجع كبير، وبالتالي قررات تحبس جميع الرحلات الرابطة بين كازا وبيكين ذهابا وإيابا.
هذ القرار جا فالوقت اللي مازال مجموعة من الطلبة حاصلين فالشينوا، بسبب عدم تمكنهم من السفر مع الوفد المغربي اللي جا بحالو للمغرب لبارح الأربعاء، فإطار المبادرة الملكية، حيث ماستاطعوش يتيريو الفلوس اللي سافطو ليهم واليديهم.
وكانوا مجموعة من المغاربة كايطالبو السفار المغربية فالصين باش ترجعهم للمغرب، خوفا من الإصابة بفيروس “كورونا” القاتل اللي شل الحركة تماما فالشينوا، وزرع فالناس الخوف، خصوصا بعد وفات 130 واحد بيه فمحافظة ووهان، وفظرف أقل من أسبوع.