زجرية عين السبع عطات السراح المؤقت لموظف شد 5000 درهم رشوة

قرر قاضي التحقيق بالمحكمة الابتدائبة الزجرية بعين السبع فكازا، إطلاق سراح الموظف، رئيس قسم الشكايات بالمحكمة نفسها، اللي تم ضبطو فحالة تلبس بتسلم رشوة قدرها 5000 درهم من مواطن متقاعد.
وحسب محمد الشمسي، محامي المشتك (ع.م) اللي سجل نيابتو عليه اليوم الجمعة، فهذ الأخير عبر على استنكارو لقرار السراح المؤقت للموظف اللي كان معتقل من طرف ضباط الشرطة القضائية، قبل ما تتم إحالتو على قاضي التحقيق اللي صدر قرار بإطلاق سراحو.
وقال المشتكي، فتصريحو ل”كود”، بللي تعرض الابتزاز من طرف المتهم اللي كان طلب منو يعطيه الرشوة باش يلغي مذكرة بحث صادرة فحقو.
وتشد المعني بالأمر عن طريق نصب كمين له من طرف السلطات، واللي ساعد على توقيفو متلبسا بجريمة الرشوة، قبل ما يقوم المشتكي بالإبلاغ بيه عن طريق الرقم المباشر الخاص بمحاربة الفساد والرشوة.