المفاوضات مع دوسابر بلغات مراحل متقدمة.. المدرب الفرنساوي وصل لكازا البارح

المفاوضات مع المدرب سيباستيان دوسابر بلغات مراحل متقدمة من أجل تعيينه مدربا للوداد البيضاوي فبلاصت الصربي زوران مانولوفيتش، اللي تقال من منصبه السيمانة، اللي فاتت.
المدرب الفرنساوي رجع لكازا البارح الجمعة باش يتفاوض من جديد مع سعيد الناصيري، رئيس الوداد البيضاوي على تدريب فريق وداد الأمة.
وسبق لدوسابر الحضور إلى الدار البيضاء منين كان مانولوفيتش مازال مدرب وتابع بعض الماتشات ديال الوداد، لكنه رجع بحالو لفرنسا بسبب عدم اتفاقه مع مع الناصري على شروطه.
ورغم أن الناصري أكد فالندوة الصحافية، أن ميگيل گاموندي، هو اللي غادي يختار مدرب الوداد إلا أن الناصري باين هو اللي باغي دوسابر فالوداد، وهو اللي كايتفاوض معاه.
دوسابر سبق ليه درب الوداد البيضاوي في وقت سابق، الشيء اللي خلا الناصري يفكر فإعادته لكن شريطة الاستجابة إلى شروطه المالية.