دوسابر طلع البارا.. طلب فلوس كثيرة باش يدرب الوداد والناصيري كيحاول يقنعو ب25 مليون ومعلول وفرانساوي فالانتظار

سيباستيان دوسابر، المدرب الفرنسي، اللي سبق ليه درب الوداد البيضاوي وبيراميدز المصري، طلب فلوس كثيرة باش يرجع للوداد مرة أخرى.
مصدر مقرب من سعيد الناصيري، رئيس الوداد، أكد ل”كود”، أن دوسابر طلع البارا مزيان هاد المرة، ما قبلش عرض الناصيري.
وحسب هاد المصدر، فإن دوسابر كان كيشد في بيراميدز 180 مليون تقريبا فالشهر، وهادشي طبعا ما يمكنش ياخدو فالوداد.
سعيد الناصيري يالاه يعطيه 25 مليون، حسب مصدر “كود”.
دابا إلا ما تفاهمش الناصري مع دوسابر في ليامات القليلة القادمة، ما شي بعيد يقلب رئيس الوداد البيضاوي على مدرب جديد، وبدا الحديث في أروقة مركب بنجلون على التونسي نبيل معلول ومدرب اخر فرانساوي.
واخا الناصري أكد في الندوة الصحافية، اللي فاتت أن مگيل گاموندي، المدير الرياضي، هو اللي غادي يختار المدرب المقبل للوداد، إلا أن هادشي كيبقى غير هضرة للاستهلاك، لحقاش الناصري هو اللي كايدير كلشي فالوداد.