صحيفة الغارديان البريطانية: ها أحسن عشرة كتب تكتبات فطنجة.. من محمد شكري لويليام بوروز مرورا ببول بولز

طنجة عندها سحر خاص كيجعل الشخصيات الأدبية الكبيرة يوقعو في حبها، واللائحة ديال العظماء الي كيعشقوها طويلة، منهم مارك توين، وإديث وارتون، وباتريشا هايسميث، وبول بولز… وعاد كاينين الكتاب الكبار الي تولدو فيها بحال ابن بطوطة، ومحمد شكري، وراوي القصص العربي العياشي المعروف ب”إدريس بن حمد الشرهادي”.
وهاذ السيمانة، كشفت صحيفة “الغارديان” البريطانية على قائمة أحسن عشرة كتب عندهم صلة بطنجة، أي إما الكاتب طنجاوي، أو كان عايش فيها، أو داز منها وكتب عليها. والقائمة قاداتها الدكتورة والكاتبة الايرلندية “كريستين مانغان” الي عندها حتى هي كتاب على طنجة باسم “طانجيرين”.
وها الكتب الي كتضم القائمة:
1- “شارع اللصوص- Street of Thieves” ديال الكاتب والمترجم الفرنسي ماتياس إينار، الي كيعاود قصة شاب مغربي جرات عليه عائلتو وغادي يعيش من الدعارة و السعاية.
2- ” أن ترحل- Leaving Tangier” ديال الكاتب المغربي الطاهر بن جلون، وهي رواية على مغربي سميتو”عازل” باغي يحرگ لسبانيا.
3- “حياة مليئة بالثغرات- A Life Full of Holes” كتاب عبارة عن تعاون بين المغربي إدريس بن حمد الشرهادي والمؤلف الأمريكي بول بولز، والرواية على أحمد، طنجاوي كيناضل باش ميفقدش الأمل فالحياة.
4- ” من بعدك الطوفان- Let It Come Down” ديال المؤلف العالمي بول بولز، والكتاب كيعاود قصة ميريكاني باغي يبدا حياتو من جديد فطنجة.
5- “الأمل ومساعي أخرى خطيرة- Hope and Other Dangerous Pursuits” ديال الكاتبة المغربية ليلى العلمي، فيه طنجة هي نقطة الربط بين الشخصيات.
6- “الغداء المكشوف – Naked Lunch” ديال الكاتب الأمريكي ويليام بوروز، كيحكي فيه على مغامرات “ويليام”، مدمن هارب من البوليس فطنجة.
7- “الخبز الحافي- For Bread Alone” ديال أشهر الكتاب الطنجاويين، محمد شكري، وترجمو للانجليزية بول بولز، وكيعاود فيه شكري على حياتو.
8- الذبابة البيضاء – Whitefly” ديال السيناريست والكاتب المغربي عبد الإله الحمدوشي، وهي رواية بوليسية البطل ديالها محقق.
9- “سي يوسف – Si Yussef ” ديال الكاتب الطنجاوي أنوار مجيد، وهي رواية البطل ديالها “سي يوسف، راجل كبير كيعاود قصة حياتو وتاريخ طنجة لشاب.
10- “الليمون -The Lemon ” ديال محمد مرابط، كاتب والرسام طنجاوي، وصاحب بول بولز، وهاذ الأخير هو الي ترجم الكتاب للانجليزية، القصة على شاب مغربي غيهرب من عائلتو فالريف، وغيمشي يعيش فطنجة.