دياز بعدما ربح لاليگا: حنا الريال ديما باغيين نربحو الالقاب وغانقاتلو فماتش البايرن

عبر الدولي المغربي براهيم دياز على الفرحة ديالو حيث ربح بطولة الصبليون مع ريال مدريد، وهو اول لقب له مع الفريق اللي جا له الصيف اللي فات، واكد انهم دابا غايبداو يوجدو لروتور دومي فينال دوري أبطال اوروبا الاربعاء الجاي ضد بايرن ميونخ الالماني.
وهضر براهيم دياز بعدما ربحو ريال مدريد كاديش بنتيجة 3 لزيرو، وداو لاليگا بعدما استفادو من خسارة البارصا من جيرونا، وقال فتصريح له: "أنا فرحان هذا هو ريال مديد ديما باغيين نربحو گاع الالقاب، والأربعاء جاي غانقاتلو على التأهل لفينال شومبيونزليك".
وقدر المغربي براهيم دياز بالتتويج ديالو مع ريال مدريد الإسباني يكون اول لاعب عربي كيربح 3 الالقاب ديال البطولة الأوربية الكبيرة، بعدما ربح بطولة النگليز مع مانشستر سيتي، وبطولة الطاليان مع ميلان، وعندو فرصة باش يدير موسم تاريخي إذا ربح شومبيونزليگ مع ريال مدريد.