دياز فك وحايل ريال مدريد مع كاديش وماركا هدف واعر وعطى باس لبيلينگهام يماركي

تألق الدولي المغربي براهيم دياز نجم ريال مدريد الإسباني، وفك وحايل الفريق فماتش كان صعيب ضد كاديش، بهد واعر بزاف وعالمي قليلة فين كايتماركا بحالو.
وكانو ريال مدريد واحلين فالماتش ضد كاديش، بعدما سالا الشوط الاول بالتعادل السلبي زيرو لزيزو، وما قدروش يوصلو للشبكة ديالهم، قبل ما يبان النجم المغربي براهيم دياز فالدقيقة 51، وخدا الكورة بكونترول واعر بزاف ودار بها ودريبلا مدافعين كاديش وغفل كلشي وضربها نيشان للشبكة ديالهم وماركا هدف عالمي.
ومن بعدها تنفسو ريال مدريد وجاتهم فرصة جديدة من واحد الهجمة دارت فيها الكورة ووصلت من عند الكرواتي لوكا مودريتش اللي عطاها للنجم المغربي براهيم دياز واللي كان سخي وماشي طماع وعطى أسيست للنگليزي جود بيلينگهام اللي من لمسة واحدة ضرب الكورة نيشان للشبكة وماركا الهدف الثاني، وفالدقيقة 90 زاد خوسيلو الهدف الثالث.
ريال مدريد بهاد الرباح قدرو ياخدو 3 بوان جديدة عززو بها رصيدهم إلى 87 نقطة فصدارة البطولة الإسبانية اللي قرب يحسم لقبها، اما كاديش زادو غرقو فأسفل ترتيب البطولة وكيحتلو المركز 18 برصيد 26 نقطة.