قبل ما يجي للمنتخب.. النصيري راوغ وماركا برجليه لإشبيلية وضارب مع المدرب وسيلتا فيگو قلبو عليهم الماتش

واصل الدولي المغربي يوسف النصيري التألق مع إشبيلية الإسباني، وماركا لهم قبل ما يجي للمنتخب المغربي باش يلعب معه 2 ماتشات وديين.
ونجح يوسف النصيري وماركا هدف التقدم لإشبيلية ضد سيلتا فيگو ضمن منافسات بطولة إسبانيا، وضرب الهدف فالدقيقة 19، بعدما راوغ دفاع سيلتا فيگو بطريقة زوينة ودريبلا آخر مدافع وانفرد بالگول ديالهم وضرب الكورة للشبكة، وهي من المرات النادرة فين كيماركي النصيري بهاد الطريقة حيث مولف يماركي بالراس، وخرج النجم المغربي فالدقيقة 61 وماعاجبوش الحال حيث تبدل لدرجة أنه نوضها مع المدرب ديالو كيكي فلوريس كون ماشي اللاعبين اللي فكوهم، وإشبيلية ما قدروش يحافظو على الرباح وسيلتا فيگو قلبو عليهم الماتش وضربو التعادل وزادو هدف الرباح.
وغيجي يوسف النصيري من بعد هذا الماتش للمنتخب المغربي باش يبدا يوجد معه الماتش الودي الأول ضد أنگولا يوم 22 مارس، والماتش الودي الثاني ضد موريتانيا يوم 26 من نفس الشهر.