رحلة الوداد ونهضة بركان تأجلت وها علاش والواك كيطالبو الكاف يبدل يوم ماتش گلاگلسي

كيتسناو الوداد الرياضي ترخيص من سلطات بوتسوانا باش طيارة الفريق تنزل فالأراضي البوتسوانية، ويلعبو مع كلاكسي البوتسوالي ضمن الجولة 5 من گروبات دوري أبطال افريقيا.
وقرر الوداد الرياضي بالتنسيق مع نهضة بركان تأجيل الرحلة الجوية الخاصة اللي غيمشيو فيها فطيارة واحدة إلى بوتسوانا وجنوب افريقيا، حتى لغدا الخميس وممكن تتأجل الرحلة حتى ليوم الجمعة، وهذا الشي حيث السلطات البوتسوانية ما زال ما عطاتش تصريح للطيارة الخاصة ديال بعثة الوداد بالنزول فبوتسوانا.
الوداد الرياضي وجه طلب حتى الاتحاد الأفريقي لكرة القدم، وخلاه على اطلاع بگاع تفاصيل الرحلة ديالو إلى بوتسوانا هذا المشكل اللي كيواجه الفريق ديال ترخيص نزول الطيارة، وطلب منو تأجيل الماتش ضد گلاكسي البوتسواني من السبت 24 فبراير إلى الأحد 25 فبراير.
وكانوا مسؤولين الوداد الرياضي ونهضة بركان اتفقوا باش يمشيو الفراقي بجوج فطيارة واحدة خاصة، تحط الواك فبوتسوانا وتكمل بالبركانيين إلى جنوب افريقيا، وكانت عاقلع الطيارة من مطار محمد الخامس هذه الليلة وتمشي لمطار وجدة تهز براكنة، مع العلم ان بركان لاعبين الاحد 25 فبراير ضد سي خيخون الجنوب افريقي فكاس الكاف.