زينباو والسكتيوي تشادو ملي سالا ماتش الرجاء والماص ومدرب المغرب الفاسي: الالماني ما كانش عليه يدوي مع أكردوم وحنا مربيين قبل كلشي

ناضت بين الالماني جوزيف زينباور مدرب الرجاء الرياضي وطارق السكتيوي مدرب المغرب الفاسي ملي سالا الماتش بين الفريقين وكانوا غيضاربو كون ما تدخلو لاعبين الفريقين اللي فكوهم.
مدرب المغرب الفاسي طارق السكتيوي خرج وهضر على شنو وقع ما بينو وبين مدرب الرجاء جوزيف زينباور، وقال فتصريح بعد الماتش: "حنا مربيين قبل ما نكونو مدربين وكل مدرب خاصو يعرف شنو كيدير ويعرف الحدود ديالو وما كانش عليه يمشي عند أكردوم.. راه لا اللاعبين والرجال ديال الرجاء ولا ديال الماص كلهم ولادنا راه دازو عندي لاعبين بحال مكعازي مقدم حتى مقدم والزنيتي داز عندي فالماص ومباريك راه كلهم ولادنا وفاش كنلعبو كل واحد كيدافع على التوني ديالو بكل احترافية وما كنبغيوش شي لاعب يتضرب شي ضربا خايبة واخا يكون لاعب ديال الفريق الخصم".
وكمل طارق السكتيوي وقال: " حنا بجوج مدربين ولكن قبل من هاد الشي حنا مربيين ومانش عليه يمشي عند أكردوم او يدوي معه".