النصيري متألق مع إشبيلية وحطم رقم الأسطورة العربي بنمبارك

رجع النجم المغربي يوسف النصيري يتألق مع الفريق ديالو إشبيلية الإسباني، مباشرة بعد الإقصاء الكارثي مع المنتخب الوطني المغربي من ثمن نهائي كوب دافريك، وقدر يحطم رقم قياسي مغربي فالبطولة الإسبانية.
وقدر يوسف النصيري يضرب 2 بيوتا لإشبيلية فماتش الفريق اللي بادي دابا ضد رايو فاليكانو، ضمن الدورة 23 من بطولة اسبانيا فكل من الدقيقة 19 والدقيقة 45، وراه اشبلية رابحين حتى لدابا فالماتش بنتيجة 2 لواحد.
وديما مع تألق يوسف النصيري فالبطولة الاسبانية، وحسب رشيد البوهالي الخبير فالتوثيق الرياضي وبالضبط كرة القدم، فولد فاس بهاد جوج بيوتا اللي ضرب مع اشبيلية على رايو فاليكانو، حطم رقم الأسطورة العربي بنمبارك اللي صمد لأكثر من 70 عام، وصبح اكثر لاعب ماركي فالبطولة الاسبانية برصيد 60 هدف.