يوم تاريخي للكورة المغربية فالشومبيونزليك: زياش عادل رقم أسطورة مغربية ومنافس مع النصيري على اخسن هداف والصيباري دخل معهم للتاريخ

كيواصل الساحر المغربي حكيم زياش التألق فالتيرانات الأوروبية، وبالإضافة إلى الجوج بيوتا اللي ماركا اليوم الاربعاء للفريق ديالو كلطة سراي التركي على مانشستر يونايتد النكليزي، راه حقق رقم واعر تعاعدل به مع أسطورة مغربية كبيرة.
واكد رشيد البوهالي المتخصص فالأرشيف الرياضي المغربي وبالضبط ديال الكورة، (أكد) لموقع "كود"، ان حكيم زياش لعب بالماتش ديال اليوم بين كلطة سراي ومانشستر يونايتد، 44 ماتش فدوري ابطال اوروبا، وتعادل مع الأسطورة المغربية نور الدين نيبت اللي عندو نفس الرقم فالمسابقة الأوروبية العريقة.
رشيد البوهالي وضح ان الجوج اهداف اللي ماركا زياش اليوم على مانشستر يونايتد، خلاوه يرفع الرصيد ديالو من الاهداف فدوري ابطال اوروبا إلى 10 اهداف، كأحسن هداف مغربي فهاد المسابقة إلى جانب المغربي الاخر يوسف النصيري، اللي حتى هو عندو نفس الرقم، بعدما ماركا لمصلحة إشبيلية الإسباني على أيندهوفن الهولندي، فنفس المسابقة ونفس اليوم، وبالمقابل سجل إسماعيل الصابيري اول هدف له فالشومبيونزليك، وهو الهدف اللي ماركاه لمصاحة أيندهوفن على إشبيلية وخلاهم يدخلو التاريخ كأول كثلاثي مغربي ماركا فنفس اليوم فدوري ابطال اوروبا.
المختص فالأرشيف الرياضي المغربي، اكد بلي هذا اليوم تاريخي بالنسبة للكورة المغربية فدوري أبطال أوروبا، حيث لاول مرة كيماركيو 3 اللاعبين مغاربة فيوم واحد فهاد المسابقة العريقة، ووضح بلي عدد اللاعبين المغاربة اللي ماركاو فالشومبيونزليك هو 24 لاعب مغربي، وعدد الاهداف اللي سجلت الأرجل المغربية هي 65 هدف فهاد البطولة الكبيرة.