فرنسا ما بغاتش تعطي هيرفي رونار للكوت ديفوار

ما بغاوش فرنسا يخليو هيرفي رونار مدرب منتخبهم النسوي يمشي يدرب منتخب الكوت الديفوار فما تبقى من ماتشات كوب دافريك 2023، اللي بادية هذه الايام فالكوت ديفوار.
وكشفت شبكة RMC الفرنسية غير دابا شوية نقلا عن مصدر فالاتحاد الايفواري لكرة القدم، ان الاتحاد الفرنسي ما بغاش يسلف مدرب منتخب عيالات فرنسا هيرفي رونار للكوت ديفوار باش يدربهم فهاد كوب دافريك بعدما جراو الايفواريين على مدربهم.
وحسب نفس المصدر، فالفرنسي هيرفي رونار اللي فايت له درب الكوت ديفوار وربح معهم كوب دافريك، كان باغي يدربهم تاني فما تبقى من هاد كاس افريقيا، واللي غيلعبو فيها فالربع مع السنغال، ولكن الاتحاد الفرنسي ما بغاش.