تايلور سويفت تقدر تكون هي نجمة الانتخابات الميريكانية الجاية.. بايدن كيعول عليها باش يربح ترامب

قالت بزاف التقارير الصحفية الميريكانية، أن الرئيس الميريكاني جو بايدن معول بزاف على المغنية المشهورة تايلور سويفت باش تعاونو فالانتخابات الرئاسية الجاية ولي غاد ينافس فيها دونالد ترامب.
الاختيار ديال تايلور سويفت ماجاش غير صدفة، فهاد المغنية العالمية كتعيش أحسن يامها الفنية دابا ومحققة شهرة كبيرة فالعالم.
حتى الأرقام كتقول أن تايلور سويفت حطمات أرقام قياسية فالعائدات ديال الحفلات ديالها لي عمر شي مغني آخر حققها فالتاريخ.
كيقولو محللين سياسيين إن تايلور سويفت معروفة بالدعم ديالها للديمقراطيين ودابا الفريق الانتخابي ديال بايدن كيفكر بجدية أنه غادي يتعاقد معها باش تروج ليه في الحملة الانتخابية.
كانت تايلور سويفت تعرضات لانتقادات كبيرة شحال هادي حينت ماعاوناتش المترشحة الديمقراطية هيلاري كلينتون فين كانت كتتنافس مع ترامب، ولكن دابا ربما هي مستعدة تعاون بايدن.
بايدن محتاج بزاف لتايلور سويفت، حيت الشعبية ديالو تراجعات بزاف خاصة عند الشباب بسباب الدعم ديالو لإسرائيل في الحرب ديالها على غزة، وهادشي لي قالتو استفتاءات ديال مؤسسات موثوقة ف البلاد.