الكاف: اصطدام قوي بين العملاق لاسيك والوداد الجريح وكلاكسي زعزعو لافريك بالرباح على الحمرا.. مصادر "كود": رمزي واللاعبين مركزين على الفوز والمورال رجع للكروب

اكد الاتحاد الافريقي لكرة القدم ان الماتش بين الوداد الرياضي والمضيف ديالو أسيك ميموزا الايفواري طرفي الكروب 2 من دوري ابطال افريقيا، غيكون صعيب بزاف، نظرا للوضعية الصعبة ديال الواك والنتائج السلبية اللي كيحصدها مؤخرا، وطموح الفريق الايفواري فمواصلة التوهج والرجوع للأمجاد ديالو.
الاتحاد الافريقي لكرة القدم تحدث فتقرير له على الماتشات ديال الجولة الثانية من دور مجموعات دوري أبطال افريقيا، ومن بينها قمة الوداد الرياضي وصيف بطل النسخة الماضية وأسيك ميموزا الايفواري وهو الماتش اللي غيتلعب فأبيدجان.
ووصف الاتحاد الإفريقي أسيك ميموزا الايفواري بالفريق العملاق، وبالمقابل وصف الوداد الرياضي بالجريح، وان الفريق الأحمر مازال متأثر بالخسارة المفاجئة امام كلاكسي البوتسواني فالجولة الاولى من دور المجموعات.
أما بخصوص الماتش الثاني عن نفس المجموعة واللي غيلعب فيه كلاكسي البوتسواني ضد سيمبا التنزاني، فأكد الكاف ان كلاكسي زعزعو افريقيا كاملة ملي ربحو الوداد الرياضي فالجولة الاولى بفوز مثير للدهشة ومن قصص الخيال، ودابا غيدخلو التنزانيين وباغيين يستمرو فهذا الشي.
وبالرجوع للوداد الرياضي والماتش ضد أسيك ميموزا الايفواري، اكدت مصادر موقع "كود"، ان بعثة الوداد فالكوت ديفوار بخير واللاعبين مركزين على الماتش والاستعدادات ديالهم مزيانة، وان الكروب بقيادة المدرب عادل رمزي عازمين عارفين المسؤولية اللي عليهم وعازمين انهم يرجعو للمغرب بالرباح ويوقفو مسلسل الخسران.