بداية خايبة للوداد فكروبات الشومبيونزليك: الحمرا ضيعت 3 بوان بالشمتة مع كلاكسي البوتسواني اللي فركع أكبر مفاجأت فالجولة 1

بداو الوداد الرياضي دور مجموعات دوري أبطال افريقيا بطريقة كارثية، بعدما خسرو مع كلاكسي البوتسواني اليوم السبت فتيران مراكش الكبير، ضمن الجولة الاولى من لكروبات.
وسالا الماتش بين الوداد الرياضي وكلاكسي البوتسواني لمصلحة الأخير بنتيجة واحد لزيرو، من تسجيل اللاعب ديالو سيسينيي فالدقيقة 34، بعدما استغل خطأ كارثي من الودادي عبد الله حيمود اللي رجع كورة ناقصة للكول يوسف المطيع، ولكن قطعها المهاجم البوتسواني ونقلها فوق الكول الودادي بذكاء ومشات نيشان للشبكة.
لاعبين الوداد الرياضي ضيعو بزاف ديال الكواري فالماتش وفرص بالجملة اللي ما تزكلش، ولكن التسرع وقلة التركيز ضيع على اللاعبين ديالو تسجيل البيوتا، وما قدروش يرجعو فالنتيجة بالرغم من المحاولات اللي دار المدرب عادل رمزي والتغييرات ولكن حتى التعادل ما تمكنوش يماركيوه، اما الخصم البوتسواني اللي تقاتلو اللاعبين ديالو فالدفاع على مرماهم حتى سالا اللقاء.
الوداد الرياضي بهذه الخسارة كيكون بصم على انطلاقة كارثي فالشومبيونزليك خصوصا وان الفريق ما موالفش يخسر فالميدان ديالو فهاد المسابقة، وكيحتل دابا المركز الأخير فالكروب 2، خلف كل من كلاكسي البوتسواني اللي فركع اكبر مفاجأة فالجولة الاولى من كروبات دوري أبطال افريقيا بالفوز على الوداد وتصدر المجموعة برصيد 2 نقاط، وفالمركز الثاني والثالث كاينين سيمبا التنزاني وأسيك ميموزا الايفواري اللي عندهم نقطة لكل فريق بعدما تعادلو فنفس الجولة مع بعض بواحد لواحد.