رمزي: باغيين نعوضو ضياع السوبر ليك بالشومبيونزليك وها الاجواء فالفريق قبل ماتش كلاكسي

اكد عادل رمزي مدرب الوداد الرياضي ان دوري ابطال افريقيا هو فرصة للفرق باش يعوض خسارة لقب السوبر ليك الافريقي، اللي ضاع له قبل أسبوعين امام ماميلودي صن داونز الجنوب إفريقي، واكد ان الواك بخير و واجدين لمواجهة كلاكسي البوتسواني غدا السبت فمراكش ضمن الجولة الاولى من دور مجموعات دوري أبطال افريقيا.
وتحدث عادل رمزي فتصريح له قبل ماتش الوداد الرياضي وكلاكسي البوتسواني وقال: "كنا كنطمحو نربحو السوبر ليك، ولكن فشلنا بسبب المستوى اللي لعبنا به الفينال وظروف اخرى، وتحسرنا على داكشي حيث كنا باغيين نهديوه للجماهير ديالنا، والخلاصة هي ان اللاعبين عطاو كاع داكشي اللي فجهدهم، وما كانش ساهل نلعبو بزاف ديال الماتشات فشهر واحد، وفوق هذا الشي كاينين لاعبين جداد فالفريق وما عندهمش التجربة".
وبخصوص دوري أبطال افريقيا، قال رمزي: "دابا عندنا فرصة نعوضو ضياع السوبر ليك ونحافظو على مستوانا ونصلحو داكشي اللي ما قدمناش فيه مزيان، ونقدمو نيفو مزيان فالشومبيونزليك، ونفسيا اللاعبين مزيانين وكيفكرو بطريقة ايجابية، وحنا عارفين المسؤولية اللي علينا ونتمناو نعطيو كثر فهاد المسابقة كيفما درنا فالسوبر ليك وأكثر".