غيبداو الوداد الرياضي يوجدو للماتش الجاي ضد نهضة الزمامرة اللي غيلعبوه بعد غدا الاربعاء فتيران مركب محمد الخامس بالدار البيضاء، ضمن الجولة 5 من البطولة الاحترافية لكرة القدم. وبرمج المدرب عادل رمزي حصة تدريبية اليوم الاثنين للوداد الرياضي، غيرجعو فيها اللاعبين للتداريب بعدما خداو يوم واحد عطلة ارتاحو فيه من عيا ماتش السبت الماضي، ضد هافيا كوناكري ضمن منافسات عصبة أبطال أفريقيا. الحصة التدريبية د الوداد اليوم فتيران بنجلون، من المنتظر يخدم فيها عادل رمزي والطاقم التقني ديالو مع اللاعبين على الجانب البدني، باش يرجعو لهم لافريشور فيزيك وأيضا، يشوفو الجاهزية ديال العناصر للمباراة الجايا. ودائما مع الوداد الرياضي، راسلت إدارة النادي العصبة الوطنية لكرة القدم الاحترافية، باش تتعرف على التيران اللي غيحل فيه الفريق ضيف على اتحاد طنجة برسم الدورة 6 من البطولة الاحترافية، حيث العصبة حدد الماتش يوم السبت الجاي مع 8 ونص وبلا ما تحدد تيران المباراة.
