ها جديد الرجاء بعد رباح التواركة وزينباور وجد بروكرام الفريق استعدادا لحسنية أكادير

غيبداو الرجاء الرياضي يوجدو للماتش المهم اللي عند الفريق مع حسنية أكادير، الويكاند الجاي فأكادير ضمن الدورة 5 من منافسات البطولة الاحترافية لكرة القدم.
وغيرجعو لاعبين الرجاء الرياضي للتداريب غدا الأربعاء، فحصة جديدة برمجها المدرب الألماني جوزيف زينباور فلاكاديمي د النادي فبوسكورة، بعدما يرجعو اللاعبين من يومين للراحة، عطاها لهم باش يرتاحو من عيا ماتش اتحاد التواركة اللي لعبوه الاحد اللي فات.
وكيخدم جوزيف زينباور هو والطاقم التقني ديالو بزاف على الجانب البدني للفريق، حيث ما عجبوش الاستعدادات اللي دار الفريق قبل الموسم، وباغي يزيد يوجد اللاعبين بدنيا، وخصوصا العناصر اللي جاو جداد للرجاء فالميركاترو، باش النيفو ديالهم يطلع ويعطيو مردود أحسن ينعكس على مستوى ونتائج الفريق اللي ربح 2 ماتشات وتعادل فجوج حتى لدابا من 4 الماتشات فالبطولة الاحترافية هذا الموسم آخرها الفوز على التواركة بواحد لزيرو.
وغيديرو الرجاء الرياضي هذا السيمانة 4 حصص تدريبية استعدادا لماتش حسنية أكادير، اللي غايديبلاصاو باش يلعبوه فتيران أدارا يوم الاحد الجاي، وباغيين يربحوه باش يطلعو لصدارة البطولة ولو مؤقتا ويديرو الضغط على ليفار ونهضة بركان اللي متصدرين دابا، في انتظار الماتش ديالهم مع بعضهم اللي تأجل حتى السيمانة الجاية، حيث لاعبين ماتشات المسابقات الأفريقية.