ما كيناش الراحة فالوداد.. عادل رمزي بدا كيوجد اللاعبين لماتش هافيا كوناكري فالعصبة

نساو الوداد الرياضي تعادل فماتش البارح الاحد مع نهضة بركان ضمن منافسات البطولة الاحترافية لكرة القدم، وبداو كيركزو على ماتش الفريق مع هافيا كوناكري الغيني السبت الجاي ضمن إياب دور 32 من عصبة أبطال إفريقيا.
الوداد الرياضي بداو كيوجدو للماتش ضد هافيا كوناكري الغيني، وقبل ما يرجعو لكازا بعدما لعبو مع نهضة بركان البارح الاحد، دارو حصة تدريبية اليوم الاثنين فبلاج السعيدية، فحصة ركز فيها المدرب عادل رمزي على إزالة العياء من اللاعبين ويخرجهم يبدلو الأجواء شوية على التدريبات الروتينية فالتيران.
وبداو الوداد الرياضي كيركزو فالماتش الجاي ضد هافيا كوناكري الغيني، والواك باغيين يحسمو الماتش برباح مريح فقلب ملعب مركب محمد الخامس بالدار البيضاء، بعدما تعادلو فماتش الذهاب بغينيا بنتيجة واحد لواحد فظروف كانت صعيبة من بينها الطقس والتيران اللي كان مكرفص.