واش دخلنا في عهد ما بعد البورطابل.. موظفون سابقون في "آبل" ختارعو جهاز جديد كيلصق فالحوايج

بدات التكنولوجية لي كتسعى أنها تتجاوز عهد التيليفون البورطابل كتخرج لأرض الواقع، وكيتعلق الأمر بواحد الجهاز كيلصق فالحوايج وكيخدم بالذكاء الصناعي والليزر ومافيهش شاشة كاع.
هاد الجهاز سميتو (AI Pin) وخلقاتو شركة (Humane) لي أسسوها 2 ديال المصممين سابقين خدمو مع "آبل"، هما عمران شودري وبيثاني بونجيورنو.
هاد البلان الجديد لي كيقولو أنه يقدر يغير الوجه ديال تكنولوجيا التيليفونات، كتلصقو ف حوايجك وكتقوليه أي حاجة كيديرها باستعمال الذكاء الاصطناعي، وكيطلق واحد الليزر كيتحول لشاشة على يديك.
كيجي هاد الابتكار الجديد بمكبر صوت وكاميرا 120 درجة وكيخدم بالويفي 5 والبلوثوث وكارط إيسيم وكاع داكشي لي كاين ف التيليفون وكثر.
الحاجة المزيانة ف هاد البلان هو أنه رخيص شوية مقارنة مع الآيفون مثلا، حيت كتقول الشركة أن الثمن ديالو ماغاديش يفوت 7000 درهم مغربية، وغادي يتطرح في الأسواق ف ميريكان ابتداءا من العام الجاي.