بوغطاط المغربي: القصة الكاملة بشأن "بيغاسوس" والمغرب... لمرابط نوضوه يشطح دارها بصح

تحية بوغطاطية للجميع،
فعالم الميديا باش تكون صحفي ناجح، خاص تكون عندك المصداقية. ونهار كتكون عندك شي معلمومة مامتأكدش منها، يا إما مكتنشرهاش كاع، أو على الأقل كتنشرها وتنشر النقيض ديالها باش تبقا موضوعي.
ولكن بحال أي ميدان.. هاد الدومين فيه موالين الحرفة د بصح وفيه المتطفلين لي كتبان ليهم الصحافة هي مهنة من لا مهنة له، وعندو استعداد يتلاح فيها بلا داك أسميتو عليه... تماما بحال ديك المعيزة ديال مسيو سوغان لي ماسمعاتش لنصائح الراعي ديالها وقطعات الحبل ومشات تحنقز فالجبل حتى كالها الديب.
واليوم أسيادنا، عندنا ليكم قصة مشابهة ولكن ماشي معيزة وإنما معيزو... ومعيزو سبيسيال من سلالة كطلانية... ولكن ماغادي ياكلو لا ديب ولا يفترسو شي وحش،... غادي غير يدردش معاه شوية بوغطاط باش يفيقو من الڭلبة.
أش قال معيزو ديالنا؟ قالك أسيدي غادي يعاود "القصة الكااااملة" وبالحجج والبراهين بلي المغرب استعمل "بيغاسوس"... وااايلي؟؟ لاااا ما تقولهااااش؟؟ معيزو قدر يدير لي مقدروش يديروه "فوربيدن ستوريز" و"أمنستي" لي أصلا ماجابوش الحجج والبراهين بلي المغرب استعمل بيغاسوس؟؟؟
معيزو قدر يدير لي ماقدراتش ديرو السلطات الفرنسية وعندو الحجج بلي المغرب استعمل بيغاسوس باش تجسس على ماكرون؟؟ معيزو قدر يدير لي ماقدراتش ديو السلطات الإسبانية وعندو الدليل بلي المغرب هو لي استعمل بيغاسوس باش تجسس على بيدرو سانشيز ووزيرة الدفاع الإسبانية؟؟
أ شاااايالاااه أ سيدي معيزو وخلااااص... والله إيلا خاصنا نفكرو نبنيو ليه شي "قبة" فتطوان، فعوض الدويرة لي كان باغي دير.
أنا أخوتي مااا نكذبش عليكم، فواحد اللحظة تيقت، واخا عارف مزيان الخوبير البايت ديال معيزو ولكن قلت نعطيوه فرصة، يقدر يكون هاد المرة هو لي شد الديب من ذيلو.
والصراااحة، معيزو فاااجأني بزاااف ودخل سخون من البداية كاااع وجاب لينا معلومة لي ماقدروش يجيبوها لا "فوربيدن ستوريز" ولا "أمنستي" ولا وزير الخارجية الإسرائيلي براسو لي كان أكد فزيارة لفرنسا بأن ماكرون ما تعرضش نهائيا للتجسس ببرنامج بيغاسوس من أي جهة كانت.
أش قال معيزو؟؟ قالك راه التلفون ديال ماكرون لي تجسس عليه المغرب ب"بيغاسوس" مااااشي هو لي كيهضرو عليه فوسائل الإعلام، وإنما هادا واحد التلفون آاااخر "personnel ،"لي النمرة ديالو كاينة عند شخص وااااااحد فقط فالمغرب. وااايلي؟؟ هادشي جدييييد هادشي.... أ شااايلاااه أسيدي معيزو !!
أودي مااا شايلاااه ما تا وزة... غير معيزو كان بغا يقول ليكم بلي هو الوحيد فالمغرب لي عاد فاق من النعاس واكتشف هاد النمرة الخاصة ديال الرئيس ماركون. حيت أصلا ديك النمرة لي كيهضر عليها كانت دارت بوووم فشي تسريبات ف 2017 مااااشي عاد دابا، ولي "فوربيدن ستوريز" براسها قالت بلي ماكرون كان باقي كيستعملها بأيام قليلة قبل مايخرجو لخرايف ديالهم ف 18 يوليوز 2021.
وزيد على هادشي كامل أنه من مور التسريبات ديال 2017 لي هضرات على هاد النمرة الخاصة ديال ماكرون، الصحافة هضرات على نوع التيليفون لي كيستعملو ولي دخلو عليه تعديلات خصيصا ليه باش يكون مأمن كثر. وتبين أن الرئيس الفرنسي عندو تيليفون من نوع samsung Galaxy S7 Edge
والمعروف أن التيليفونات ديال Samsung كيخدمو بنظام Android لي "أمنستي" براسها كانت قالت بلي هاد النظام ما كيكشفش الآثار ديال برنامج "بيغاسوس" ماشي بحال نظام iOS ديال iPhone .ولكن فجميع الحالات ما كتقدرش تعرف أصلا شكون الجهة أو الدولة لي تجسسات عليك.
ولكن حيت معيزو ديالنا كيجيب المعلومة من قاع الخابية وكيفهم بزااااف فالتكنولوجيا، كثر من هاد المنظمات وهاد المختبرات، قالك أسيدي بلي هاد "بيغاسوس" عندو واحد البصمة خاصة، وبلي الشركة ديال NSO فاش كتبيعو لشي دولة، كترمز ليها بواحد code خاص بيها وبداك code كيقدر مختبر التحليلات يعرف شكون الدولة لي تجسسات عليك.
وااايلي؟؟؟ منين جاب هاد المعلومة لي عمر تذكرات من قبل أصلا. وا إيلا كانت القضية بهاد السهولة علاش الإتحاد الأوروبي قرر يدير لجنة تقصي الحقائق بخصوص استعمال "بيغاسوس" باش يعرف كيفاش تستعمل هاد البرنامج وشكون استعملو؟؟ كانو غير يمشيو عند مختبر Citizen Lab لي تابع لأمنستي ويقول ليهم كاع التفاصيل.
تا أش كتقول أبوغطاط؟؟
مااااشي أنا لي كنقول. معيزو هو لي قال أن Citizen Lab مجهد على F.B.I ديال ميريكان. وبلي F.B.I براسها كتقول بلي الخبرة ديال مختبر Citizen Lab حسن من ديالها.
خطيييرة هاد القضية. جهاز أمني ديال أقوى دولة فالعالم غادي يعترف بالعلالي بنقطة ضعفو؟؟؟ منين جابها هادي تاني؟؟ وا هي ممكنة فحالة وحدة فقط وهي يكون F.B.I براسو اعترف ل معيزو بلي التحقيقات والمقالات لي كايدير ف Middle East Eye ديال قطر وفموقع Moroccomail ديال الدزاير، حسن 2000 مرة من الخبرات ديال Citizen Lab وحسن شي 3000 مرة من ديال F.B.I.
أوديييي... بحااااال فايتلي سمعت بحال هاد لخرافة من عند شي حد آخر، قالك مشا دار شي خبرة على "المؤخرة" ديالو باش يعرف واش هي ولا ماشي هي لي بانت فواحد الفيديو، وقال على المختبر الأمريكي لي مشا عندو بلي F.B.I كيعتمدو على الخبرات ديالو... مممم ماعليناش.
وا كون أسي معيزو هادشي بصح وكون "أمنستي" والمختبر ديالها و"فوربيدن ستوريز" وهاد الصحف كاملين عندهم بصح هاد الدلائل والحجج، كون قدموها للقضاء فاش رفع عليهم المغرب دعوى وكلف المحامي باراتلي باش ينوب عليه (هاد المحامي لي مختص فقضايا التشهير ماشي مختص فقضايا التجسس كيف قلتي أسي معيزو... خاصك تعاود النظر فالمعلومات ديالك) وديك الساعة يفرشو المغرب قدام العالم كامل ومن داخل مؤسسة القضاء الفرنسية.
ولكن الااا... معيزو شايف لي ما شايفينوش الناس العادية. وعندو المعلومات لي ماعندش "أمنستي" ولا Citizen Lab ولا "فوربيدن ستوريز" ويمكن حتى F.B.I...بلي المغرب كيتجسس على كولشي.
أشنو جاب تاني معيزو ديالنا؟؟ شي تسريب مضايرش؟؟ شي تنقنيقة جديدة؟؟
فوووت التسريب لهيه وفووووت تنقنيقة لهيه.. المصدر ديال معيزو هاد المرة غيكون "شاهد من أهلها"، لدرجة طلب autorisation ديال دنيا فيلالي باش يهضر عليه.
الااااا.. ما تقووولهاااش.. شي ضابط فالمخابرات المغربية هادا؟؟ هو ماشي ضابط فالمخابرات ولكن كان خدام فالبوليس. واايلي شكوون؟؟
نه عمو الخراز.... طاح عليه معيزو عند دنيا فيلالي وهو يزيرو مزييياااان واعتارف ليه بكولشي... وقال ليه بلي كاع المكالمات فالمغرب مراقبة وكيتصنتو على التيليفونات.
ومعيزو قال تاني بلي حتى عبد الله البقالي رئيس النقابة الوطنية للصحافة المغربية كان قال فشي تصريحات لحميد المهداوي لي وصفو معيزو بأنه "يوتوبر"، ماشي صحافي. (حيت معيزو هو لي عندو الكاشي ديال شكون صحفي وشكون ماشي صحفي، وشكون لي صحفي د بصح وشكون لي صحفي ديال الكيلو)، قال بلي راه كيتصنتو على المكالمات.
ولكن شنو علاقة التصنت على المكالمات (لي جاري به العمل فكاع الدول من نهار بان التيليفون أول مرة) ولي كيكون فإطار القانون وبإذن من القضاء، شنو علاقتو باستعمال برنامج بيغاسوس؟؟
كيفاش شنو العالقة؟؟ نتا غاتفهم كثر من معيزو لي كيفهم كثر من Citizen Lab وكثر من F.B.I؟؟
ونزيييدك أسيدي. كاين مااا كثر من هادشي.
معيزو جاب تاني تنقنيقة مضايراش، بحاال زعما مكان كيعرفها حد.
قالك راه واحد تسريب كشف ف 2016 بلي المغرب وتحديدا DGST كانت شرات شي برنامج سميتو Medusa من عند واحد الشركة فنيوزلاندا سميتها Endace، خاص باعتراض الاتصالات فالأنترنيت.
إيوا ولكن شنو تاني العلاقة ديال اعتراض (interception) الاتصالات فشبكة الأنترنيت ببرنامج بيغاسوس لي كيستهدف الهواتف الشخصية والمعطيات لي فيها، ماشي كيستهدف شبكة الأنترنيت أو شبكة الاتصالات.
وإسرائيل وميريكان براسهم وحتى دول أوروبية خرى شراوه وكيستعملوه.
وااا تااا نتا شحاااال فيك وشحال كتحكر !!! راه بحال "بيغاسوس" بحال Medusa بحال التصنت على المكالمات... طلب غا الصحة والسلامة. واش نتا غادي تفهم كثر من معيزو؟؟؟
أصال هاد التسريبات لي نشرها موقع The Intercept براسها تبين بلي مشكوك فأمرها وحتى هي كان فيها الدغول. تماااما بحال التحقيقات ديال "فوربيدن ستوريز". وسبحان الله مول الموقع ديال The Intercept لي سميتو Pierre Omidyar صدق هو نفسو الممول ديال "فوربيدن ستوريز".
ولكن معيزو كيمارس الصحافة على طريقة "قص ولصق" (découpage/collage) ديال الدراري الصغار، بحيث كياخذ رابعة ديال المعلومة من هنا ونص كيلو من لهيه، وشي قبيسة من قنت آخر، ويخلط ويجلط داكشي بالطريقة لي باغيها هو باش يوصل للنتائج لي باغيها هو، ماشي باش يوصل للحقيقة.
بحال لي دار مع بلاغ ديال النيابة العامة المغربية بخصوص قضية بيغاسوس. وقدمو على أساس أن النيابة العامة طلبات من الشرطة القضائية يتفتح تحقيق فمسألة التجسس وبلي فنفس الوقت خدمات مصطح "اتهامات ومزاعم"... ما يعني حسب معيزو أن التحقيق من الأول مغشوش مادام حكمو بلي داكشي غير اتهامات ومزاعم.
فحين أن الباغا ديال النيابة العامة (لي كان بتاريخ 21 يوليوز 2021) جا من مور بلاغ ديال الحكومة (بتاريخ 19 يوليوز 2021) لي نفى فيها بأن المغرب استعمل بيغاسوس وطلب من الجهات لي اتهماتو يجيبو الدليل، لأن "البَيّنَة على من ادعى" ماشي العكس، لذلك النيابة العامة فاش طلبات يتفتح تحقيق، طلباتو على ود باش تعرف مصدر ديال هاد االدعاءات.. ولكن معيزو كيقطع ويلصق ويحرف كيف بغا.
وزيد على هادشي أن السلطات المغربية براااسها ممثلة فإدارة الدفاع الوطني التابعة للقوات المسلحة الملكية كانت أصلا سبااااقة لهاد الموضوع ديال بيغاسوس ودارت نشرة تحذيرية عليه (فشهر ماي 2019) يعني قبل ما يخرج التحقيق ديال "فوربيدن ستوريز" بأكثر من سنتين.
كيفما كانت دارت نشرات تحذيرية على Les mise à jour ديال نظام iOS وبعض التطبيقات لي كاينة فمنتجات شركة Apple لي خاصهم يدارو بسبب بعض الثغرات لي فيها ولي يقدرو يخليوها تتعرض للاختراق عن طريق "الشبكة" وهو نفش الشيء لي قالت أمنستي أنه تعرض ليه عمر الراضي.
ولكن معيزو هادشي مكيشوفوش، وقالك أسيدي الدليل لي مااااا بعده دليل على أن المغرب عندو بيغاسوس، هو أن بعض المواقع نشرات معطيات شخصية على عمر الراضي.
شناهي هاد المعطيات الشخصية؟؟ وفين هي؟؟؟ ما شفنا وااالو.
ياكما معيزو بغا يأكد بلي داكشي لي كتب الصحافي المحترف أبو وائل، الله يعطيه الصحة، على عمر الراضي راه "Vrai de Vrai..."ويمكن كاع معيزو بحكم علاقتو الممتازة مع F.B.I ،عارف بلي داكشي لي نشرو أبو وائل ماشي كامل وبلي ما خفي كان أعظم.
خلاصة القول من هادشي كامل وهو أن معيزو ما صحافي ما تا وزة. تلات بيه ليام ولا كيدير الحلقة فيوتيوب وكيجمع فالمقالات من هنا من لهيه وكيقطع ويلصق ويلبق داكشي بالطريقة لي كاتناسبو.
ولكن واش هو ك "صحافي" كيف كيدعي، واش مشا جاب شي معلومة جديدة بالحجة والدليل فهادشي ديال بيغاسوس؟؟ واش شارك مع دوك 11 صحفي فالتحقيق ديال "فوربيدن ستوريز" لي قال عليهم أنهم صحفيين ديال بصح ماشي ديال الكيلو؟؟ واش دار شي استجواب مع شي شخصية أو شي مسؤول كشف فيها شي معلومة جديدة مدايراش؟؟؟
معيزو حتى حاجة من هادشي ما دارها ولا عمرو يديرها. لأنه ببساطة الطريقة لي كيخدم بها كيف قلت من قبل هي أنه كيمارس الصحافة على طريقة "قص ولصق" (découpage/collage) ولكن قبل من هادشي، أشنو كيدير؟؟
معيزو أول حاجة كيديرها هي كيحط فراسو واحد الأطروحة، لي باغيها هو، ماشي "الحقيقة" لي خاص يعرفوها الناس. (مثال فهاد القضية ديال بيغاسوس. بالنسبة ليه هو من الأول "المغرب عندو بيغاسوس وتجسس بيه على العاااالم كاااامل"، واخا الدول لي قالو بلي المغرب تجسس عليها، براسها نفات هادشي).
من مور ما كيحطها قدامو، أش كيدير؟؟
كيبدا يقلب على المقالات والمعطيات لي غاديا معاه فداك الطرح واخا تكون كذوب. منبعد كيرتبها بواحد الطريقة لي تبان منطقية (ولكن لي تبان منطقية بالنسبة لي ماغاديش يدير مجهود باش يمشي يقلب واش معيزو كيكذب ولا لا).
وباش كايملّحها ويبزرها، ضرووووري ما يربط داكشي لي كيقولو معا شي خرافة عاشها هو، واخا تكون كذوب، باش يقول: هاااا شفتو؟؟ راه قلتها ليكم حتى أنا وقعات ليا.
وفحالة ما إذا ما لقاش شي خرافة عاشها، كيقلب على شي تصريح ما عندو لا ساس لا راس بحال لي دار مع الخراز باش يقول... هاااا وا ها هو فلان كان déjà قالها، علما أنه ماقال والو على الموضوع الأساسي.
واش كاين شي صحافي مهني كيدير هاد الخدمة لي كدير أسي معيزو؟؟
مع الأسف معيزو من مور ما فشل فالدبلوماسية وطردوه منها وفشل باش يبقى فلوجورنال، وفشل فالمشروع ديال المجلة ديالو ديال Demain magazine لي خدا التمويل ديالها من عند رجال أعمال ديال القصر، وفشل حتى مع الصبليون من مور ماستغناو على الخدمات ديالو ف صحيفة El Mundo وفشل يدير مشروع ديال رياض سياحي، وفشل يدير موقع صحفي.... ها هو حتى الحلقة ديال "اليوتيوب" كيفشل فيها.. و كيقيل يعاود فالحجايات وخرايف جحا لي ما عندها لا ساس ولا راس.
ولكن الحاجة الوحيدة لي ناجح فيها معيزو هي الشكا والبكا وشوية ديال تاشكمات ولحيس الكابة للجزائر... هادشي بعدا كيطييير فيه... وزاد كملها وجملها، غادي كيجري عند قنوات إسبانية كيطلب ويرغب ويزاوك فيهم باش يدوز عندهم فالبلاطو باش يتهم بلادو بوجهو حمر بلي هي لي تجسسات على إسبانيا، فالوقت لي اسبانيا براسها نفات هادشي على لسان وزير الخارجية ديالها وعلى لسان الناطقة باسم الحكمومة ديالها، بل حتى القضاء ديالها حسم فهاد الأمر وبرأ المغرب من تهمة التجسس ببرنامج بيغاسوس.
واش كاين شي وقاحة فتشكامت كثر من هادي؟؟ واش كاين شي خيانة كثر من هادي؟؟
أصلا هادا هو السبب لي خال معيزو يجي كيجري باش يدير فيديو بالدارجة المغربية، باش يغطي على الباطل لي نزلو على بلادو فقنوات البراني وبدا كيلقم فالخبيرات البايتين ويعاود يجتر فيهم كي شي معيزو نيييت... داكشي علاش من دااابا عااارفين أش غادي تقول فالجزء الثاني ديال الفيديو وما يحتاااجش نتفرجو فيه.
وماغاديش نقول لمعزيو ديالنا فيق من الڭلبة، حيت عمرو يفيق منها لا هو ولا لي وصلو لهاد درجة التخريف بحالو وبحال زيان وعبد المومني وغيرهم... لي ولاو متزعمين معارضة ديال 3iéme division لي عمرها تطلع ل 1ère division حيت مواليها ما عمر كان عندهم شي تاريخ مشرف ولا عمرهم يقدرو ينسيو الناس فالعجينة لي فكرشهم.
ولكن غير أنا مزاوڭ أمعيزو لاما جيب شي حاجة مقادة هاد المرة، ماشي تجيب عاوتاني شي خرماز صبليوني، وتقول هادا دليل بلي المغرب عندو بيغاسوس.