عادل رمزي: مرتاح للرباح اللي حقق الوداد على الترجي ومازال لينا الشوط الثاني فتونس

عبر عادل رمزي مدرب الوداد الرياضي على الارتياح ديالو للمستوى والرباح اللي حقق الفريق الأحمر على الترجي التونسي فذهاب دومي فينال السوبر ليك، واكد أن الواك دار شوط أول مزيان فكازا ومازال ليه شوط ثاني فتونس.
وتحدث عادل رمزي فالندوة الصحافية بعدما ربحو الوداد الترجي بواحد لزيرو وقال: "مرتاح للأداء اللي قدمو اللاعبين ديالي حيث التنظيم اللي طلبت قدموه تحكمنا وخدينا المبادرة فالماتش خصوصا فالشوط الأول وفالشوط الثاني كان شويا ديال العيا".
وكمل عادل رمزي: "خلقنا فرص وماركينا هدف اللي مهم بزاف وأهم حاجة ما ستقبلناش شي هدف وبالنسبة ليا كتبقى نتيجة ايجابية، والترجي جاوهم حتى هما فرص اللي صعاب ولكن الدراري قدمو اللي عليهم والأداء ديالنا كيتحسن، حيث كنلعبو مع فرق كبار وباش تتحكم وتبادر الماتش كل فكازا راه حاجة مزيانة، ولكن كاينين شي حوايج اللي خاص يتصلحو وفهاد النيفو الفرصة اللي جاتك خاصك تماركيها باش تسهل على راسك المأمورية".
وأكد عادل رمزي: "وكيفما قلت الدومي فينال فيه 180 دقيقة لعبنا الشوط الاول فكازا والشوط الثاني غنلعبوه فتونس وغيكون الماتش صعيب وهذا الشي عارفينو، دابا خاصنا نرتاحو ونمشيو نكملوها فتونس".