واخا يخطفوه ليك ميشوفوش ميساجاتك.. خاصية جديدة من "واتساب" غادي تهنيك من البركَاكَة

بلان جديد خداما عليه واتساب وقريبة تزيدو فالأبليكاسيون ديالها، غادي تزيد من حماية الخصوصية ديالكم وماغادي تخلي حتى واحد يقدر يضرب شي طلة على داكشي لي كتقول وكتطابي.
على حساب ما جا فواحد الموقع سميتو وابيتا إنفو، لي متخصص فهادشي ديال آخر ما غنات التكنولوجيا، فشركة واتساب غادي طلق هاد البلان الجديد فالقريب العاجل، وغادي تخلي بنادم يسد الواتساب بالساروت.
يعني حتى إيلا فرضنا أن بنادم خطف ليك التيليفون ونتا مدايرش ليه الكود، راه ميقدرش يطل على الهضرة ديالك فواتساب حيت تقدر تسدهم بواحد الكود لي غادي كون عندك غير نتا.
آيه، هاد البلان يقدر ميعجبش بزاف د الدريات، ولكن المهم هي الثقة.