تلقاه عمرو شرا تا بيجامة لمو و غادي كايجري شاري وردة لموسطاشتو‎

أنا شخصيا كانفرح فاش كانشوف شي واحد شاري وردة لمرتو و لا صاحبتو فعيد الحب و لا فاش كانشوف جوج د الناس خارجين يتعشاو بمناسبة الحب، علاش ؟ حيت كيف ماكان الحال كايبقا احتفال بالحب مايمكن إلا نثمنوه ! الحب لي بزاف فينا ماكايعرفوهش و ماعمرهم شافوه و كبرو فيه ! الحب لي باش تمارسو و تعيشو خاصك ليه ماهي و ما لونها و غالبا لابغيتي تمارسو (بلا شوار العدول) تقدر تلقا راسك واقف عند الوكيل ملوي فيزار بيض كي اللفتة و كاتحلف ليه ” و الله مانا آ سعادة جلالة الوكيل ! غاااا الشيطااااان ولد الحرام و صافي” ! داكشي علاش كانفرح فاش كانشوف جوج كايتحابو و كايعبرو لبعضياتهم على الحب ( و ديك الهضرة ديال هاد العيد عيد تجاري ! استهلاكي سير كولها ! ماشغلناش فيها ! المهم هوا الغاية و الغاية د هاد العيد هي الحب آ وجه تامارا)!
و عيد الحب تخلق فالأساس للاحتفال بالحب بين شريك و شريك ديالو ! بين الراجل و مرتو ! الصاحب و صاحبتو ! و العالم كامل كايحتافل بيه بهاد الطريقة ! إلا عندنا حنا، بانت واحد لافاريونط جديدة ! و غير كاتجبد الهضرة على عيد الحب و كايخرجو شي نماذج فالفايسبوك مخالط ليهم عيد الحب مع عيد الأم مع عيد المسيرة ! كايغوتو ” أمي ! الحب الأول و الأخير” ” موي نتي لي تستاهلي نبغيك” و باش كايكملوها و كايجملوها كايعيبو على لي محتافلين بعيد الحب بديك الهضرة ديال ” تلقاه عمرو شرا تا بيجامة لمو و غادي يشري وردة لموسطاشتو ” ” واا سير فلوس الورد شريهم لحيمات و فرح بيهم ميمتك ” نتا لي كاتقول هاد الهضرة ديال لحيمات! و كاتبرد على راسك بيها نتا دينمك بزاف عليك تفهم الحب و تعرف الحب ! غاتبقا ديما كاتفكر فاللحم و الخبز و البطاطا تايدفنوك وسط شي قبر و يجيو يخراو عليك السكايرية فالليل دوك اللحيمات لي شراو ليهم ولادهم فعيد الحب!
علاش مجموعة ديال الذكور المغاربة رافضين يقطعو داك الحبل السري لي كايربطهم بماواتهم؟ و كايخطلو بين علاقاتهم بماواتهم و علاقاتهم بعيالاتهم ؟
الجواب ساهل ماهل ! حيت ماواتهم هوما الوحيدات لي قادرات يعطيوهم واحد النوع ديال الحب اللامشروط ! كاتلقا راسو قد الطارو د نيدو و جالس حداها مدلدل درگومو و هي فرحانة بيه ” ايه وليدي غزال ألف وحدة تتمناه ! لالة البنات نجيبها ليك نتا غير آمر ! وا الزين الغزاااال ها هواااا ! وااا عوود الخيزراااان هاااهوااا ” هوا ضعيف و طويل كي بشنيخة ! قاتلو غا الجوع و قهوة كحلة و مو كاتعيط ليه عود الخيزران شوف البهوت كي داير!! عود الخرا حاشا الساميعين هاداك آ ميمتي! كايخرج ” عود الخيخران” للزنقة ماكايلقا تاوحدة تتمناه ! تاوحدة ماتقبل عليه بكالاخو و عفنو و وسخو و قلة ترابيه ! كايرجع عاوتاني للدار حادر گمگومو كايلقا غا مو لي قابلة عليه و كايجيها راجل و سيد الرجال ! وهنا فين كاتربى عندو عقدة من العيالات و العلاقات مع العيالات و حب العيالات …
ماعمرك تلقا انسان سوي كايعقد مقارنة بين علاقتو بمو وعلاقتو بمراتو و لا صاحبتو ! بنادم لي سوي و واعي راه عارف بلاصة مو فين و بلاصة مرتو فين و بلاصة بنتو و ختو فين ! و كل وحدة و بلاصتها و الحب ديالها ! ماشي بعرور ! مسوس الظفار ! غير كاتبان ليه الحاجة زوينة و كايبغي يخسرها ! بعرور لي كايكره الحب ! لي ماكبرش بالحب و ماعاش الحب و ماقادش يعطي الحب … باغي كي مو كي ختو كي مرتو ! تالفة لباباه الحلوفة !
واش كاين شي حد بعقلو كايشوف شي واحد محتافل مع صاحبتو و لا مرتو بعيد الحب و كايقوليه ” دوك الفلوس كون شريتيهم كيلو بانان و دخلتيه على ميمتك ؟” ! على اساس بنادم كايعيش غير بالبطاطا و البانان و مو و صافي هادي هي لافان !
آ سمع آ سيموحمد ! راه و الله ماكاينة لي تقبل عليك بخنونتك من غير مك و الحل ماشي هوا تهرب من العيالات و ترجع عندك موك و تتخبى فحجرها !
الحل هوا تزيان ! و تصلح راسك و داك الدلقوش عندك ! و تكون راجل و نص ! ذكي و مسؤول و قااااااد براسك ! لابغيتي تبغي و تتبغى و تعيش الحب الحقيقي لي كايخليك تزيد القدام فحياتك ع الله و عسى تحتافل تانتا بالسانفالونتان و تهنينا من المداخلات ديالك المبوؤسة ! و لا ماتحتافلش بيه آ سيدي و لهلا يطيح شكلاطو فكرشك دخل غا سوق راسك و خلي لي بغا يعيش الحب يعيشو !
يا على باشار ! كايحارب الحب !