حققو الرجاء الرياضي رباح مهم اليوم الاحد، بعدما فازو على المغرب التطواني فمركب محمد الخامس بالدار البيضاء، ضمن الدورة 6 من البطولة الاحترافية لكرة القدم. وسالا الماتش بين الرجاء الرياضي والمغرب التطواني بنتيجة واحد لزيرو لمصلحة النسور، وتسناو الرجاويين الشوط الثاني باش يماركيو هدف الرباح من بيلانتي سجلو ادم التفاني من كوفرة فالدقيقة 53، مع العلم أن هاد الكوفرة كانت سبب فأن المغرب التطواني يكملو الماتش ناقصين حيث تطرد لهم أيوب المودن اللي كان آخر مدافع وطيح نوفل الزرهوني اللي كان فاص افاص مع الكول التطواني. الرجاء الرياضي وبعد هذا الرباح خد 3 بوان مهمة رفع بها الرصيد ديالو إلى 12 نقطة، وحافظ على نفس الفارق مع نهضة بركان المتصدر برصيد 14 نقطة، والخضرا كتحتل المركز الثالث دابا، أما المغرب التطواني بعد هذا الخسران تراجعو إلى المركز 6 وبقات عندهم 10 النقاط. للإشارة فالرجاء الرياضي مهدد دابا بعقوبات من طرف العصبة الاحترافية لكرة القدم، ومن المنتظر تصدر فحقهم عقوبة الويكلو بسبب الكراكاج اللي دار الجمهور ضد المغرب التطواني.
