المغربي أمين باسي ربح ميسي وبيكهام وفريقهم انتر ميامي ففينال كأس مريكان وتوج باللقب (تصاور)

قاد اللاعب المغربي أمين باسي الفريق ديالو هيوستن دينامو للتتويج بكأس الميريكان للمرة الثالثة فتاريخو، بعدما ربح فالفينال فالساعات الأولى من صباح اليوم الخميس اللي هي لعشية فميريكا، (ربح) فريق الأسطورة الأرجنتيني ليونيل ميسي إنتر ميامي ومولاه النجم النكليزي ديفيد بيكهام بنتيجة 2 لواحد.
ودار المغربي أمين باسي ماتش مزيان مع هيوستن ضد انتر ميامي، وهو اللي عزز النتيجة للفريق بهدف ثاني فالدقيقة 33 من بيلانتي، بعدما افتتح التسجيل صاحبو دورسي فالدقيقة 24، أما انتر ميامي ماركاو هدفهم فآخر لحظات الماتش بواسطة مارتينيز، وهذا الشي وقع قدام ليونيل ميسي الكابيتان ديال ميامي، اللي كان كيتفرج من المدرجات وما لعبش حيث موعت، وعرف الفينال حضور عدد من النجوم باش يتفرجو، بحال النكليزي ديفيد بيكهام مول انتر ميامي والنجم الفرنسي زين الدين زيدان.
للإشارة، فأمين باسي مهاجم هيوستن هو من جنسية مغربية وتزاد ففرنسا وكبر فيها، وعندو 25 عام دابا، وسبق لعب مع نانسي وميتز ففرنسا وبانسلي فالنكليز، وهو حاليا محترف ففريق هيوستن المريكاني اللي ربح معه كأس المريكان على ظهر انتر ميامي اللي وصل للفينال بفضل النجوم ديالو الأرجنتيني ليونيل ميسي والإسبانيين جوردي ألبا وسيرجيو بوسكيتس، والاستثمار ديال مول النادي النجم النكليزي ديفيد بيكهام.