ميسي توعت وما قدرش يكمل ماتش ميامي ومشكوك واش يلعب فينال كاس مريكان

توعت الأسطورة الارجنتيني ليونيل ميسي، ليلة الاربعاء-الخميس، فماتش ديال فريقو انتر ميامي مع تورينتو ضمن منافسات بطولة مريكان لكرة القدم.
وخرج ليونيل ميسي من الماتش فالدقيقة 37، حيث ما قدرش يزيد يلعب مازال، مع العلم أنه ما لعبش الماتش اللي قبل مع انتر ميامي ضد أطلانطا بسبب الإرهاق.
وفتصريح له كشف الارجنتيني طاطا مدرب انتر ميامي، بلي ليونيل ميسي ما غيلعبش الماتش ضد أورلاندو سيتي الأحد الجاي، نفس الشي للاسباني جورجي ألبا اللي حتى هو توعت فاخر ماتش وخرج قبل ميسي فالدقيقة 34.
مدرب انتر ميامي أكد أنهم مازال ما عارفينش واش ليونيل ميسي وجوردي ألبا غيكونو حاضرين مع الفريق فالفينال ديال كاس مريكان السيمانة الجاية، وغيتسناو الخدمة ديال الطاقم الطبي ومجهوداتو باش يوجدوهم.