آخيرا.. الأسطورة ميسي حقق الحلم المستحيل وقاد الأرجنتين للتتويج بكأس العالم فنهائي مشوق أمام فرنسا

قاد أسطورة كرة القدم العالمية ليونيل ميسي منتخب بلادو الأرجنتين للتتويج بكأس العالم للمرة الثالثة فتاريخو من بعدما ربح اليوم الأحد، فنهائي مونديال قطر 2022 فتيران لوسيل بالعاصمة القطرية الدوحة بضربات الترجيح من بعدما سالا الوقت الأصلي ديالو والأشواط الإضافية بنتيجة 3 أهداف لكل منتخب، فواحد من أحسن المباريات النهائية في تاريخ كأس العالم.
وقدر منتخب الأرجنتيني يخرج متقدم فالشوط الأول بنتيجة 2 أهداف لزيرو أمام فرنسا، وسجل الهدف الأول الكابيتان ديال المنتخب الأرجنتيني ليونيل ميسي من ضربة جزاء تحصل عليها أنخيل ديماريا فالدقيقة 23، ومن كونتر أتاك قدرو اللعابا الأرجنتنيين يسجلو الهدف الثاني بواسطة أنخيل ديماريا فالدقيقة 36.
أما فرنسا فتمكنت فالشوط الثاني من الرجوع فنتيجة الماتش وقدرت تماركي فالربع ساعة الأخيرة من مباراة الفينال بهدف أول من بيلانتي سجلو كيليان مبابي فالدقيقة 80 ورجع بسرعة مبابي وسجل هدف التعادل لفرنسا فالدقيقة 81، فسيناريو مشوق لماتش الفينال، حيث حتى حد ما كان كيتوقع ترجع فرنسا فنتجية المباراة فوقت كانت فيه الأرجنتين مسيطرة على الماتش مزيان.
ومن بعدما سالا الوقت الأصلي ما بين الأرجنتين وفرنسا بالتعادل الإيجابي بنتيجة 2 أهداف لكل منتخب، مشاو الطرفان يلعبو الأشواط الإضافية لحسم المتوج بكأس العالم 2022، ونجح الأسطورة ليونيل ميسي فتسجيل الهدف الثالث ديال الأرجنتين فالشوط الثاني فالنهائي على فرنسا ومرة أخرى ومن بعدما ظن الجميع أن الأرجنتين حسمت اللقب رجع مبابي من جديد وسجل هدف التعادل ومشى الماتش لضربات الترجيح واللي ضحكت لمنتخب الأرجنتين بنتيجة 4 مقابل 2 وتوج باللقب الثالث فالتاريخ ديالو من بعد 1978 و1986.