الفيفا علن على 5 أحسن كوال فالعالم ورشح السبع المغربي ياسين بونو باش يربح جائزة The Best

رشح الاتحاد الدولي لكرة القدم الكول المغربي ياسين بونو باش يربح جائزة أحسن كول فالعالم لعام 2023، وهادي هي المرة الثانية بعد عام 2022.
وعلن الاتحاد الدولي لكرة القدم على أسماء 5 حراس مرمى المنافسين على جائزة the best ديال الفيفا، لأحسن كول فالعالم، واختار ياسين بونو المنتقل من إشبيلية الإسباني إلى الهلال السعودي على رأس اللائحة المصغرة، ومعه كل من البلجيكي تيبو كورتوا كول ريال مدريد، والبرازيلي إيديرسون كول مانشستر سيتي، والكاميرون اندري أونانا المنتقل نت انتر ميلان إلى مانشستر يونايتد، والألماني تير شتيكن كول البارصا.
وراه بدات عملية التصويت على الأسماء المرشحة باش تربح جائزة أحسن كول فالعالم من عند الاتحاد الدولي لكرة القدم "الفيفا"، وياسين بونو عندو الحظوظ ديالو باش يربح الجائزة مع العلم أن العام اللي فات بزاف ديال المتتبعين شافو أنه تظلم حيث عطاوها للأرجنتيني إيميليانو مارتينيز اللي ما كاينش دابا مع 5 أحسن كوال فالعالم.