نائب عمدة كازا: الأشغال فدونور غتبدا فأكتوبر الجاي

غيتسد تيران مركب محمد الخامس بالدار البيضاء ابتداء من شهر أكتوبر الجاي، باش يتصلح استعدادا لاحتضان المغرب كأس إفريقيا 2025.
وعلن عبد اللطيف الناصيري نائب عمدة الدار البيضاء، واللي مكلف بقطاع الثقافة والرياضة فكازا، أن الإصلاحات فدونور غتبدا الشهر الجاي.
وقال عبد اللطيف الناصيري فتدوينة على فيسبوك: "أخبر العموم بأن أشغال تأهيل المركب الرياضي محمد الخامس والمرافق التابعة له، ستنطلق بداية شهر أكتوبر المقبل".
ودابا ولاو الرجاء والوداد الرياضيين مطالبين باش يلقاو حل فين يلعبو ليماتش ديالهم، كيبقى تيران البير جيكو فكازا هو الأقرب باش يلعبو فيه الماتشات ديال البطولة وكأس العرش، والواك غيلعبو بنسبة كبيرة المنافسات الإفريقية فتيران مراكش.