ها فين غيتدربو الأهلي فكازا قبل الفينال مع الوداد

حدد الاتحاد الإفريقي لكرة القدم التيران اللي غيتدرب فيه فريق الأهلي المصري بكازا، ملي غيجي إلى المغرب يلعب روتور فينال عصبة أبطال إفريقيا ضد الوداد الرياضي.
وخصص الاتحاد الإفريقي لكرة القدم تيران العربي الزاولي، كملعب لتداريب الأهلي المصري اللي غيجي الخميس إلى المغرب، أما الحصة التدريبية قبل الأخيرة غيديرها الفريق المصري فتيران مركب محمد الخامس بالدار البيضاء يوم السبت الجاي، وهو الملعب اللي غيتلعب فيه الماتش الأحد الجاي.
وكان ماتش الذهاب بين الوداد الرياضي والأهلي المصري ديال فينال عصبة أبطال إفريقيا بالقاهرة، سالا بفوز الأخير بنتيجة 2 لواحد، والواك خاصهم يربحو غير بواحد لزيرو على الأقل فالروتور بكازا، باش يربحو لقب عصبة أبطال إفريقيا للمرة الرابعة.