الركراكي: فرحانين حيث غنلعبو فأكادير عند ناس سوس.. وغندخلو نربحو ليبيريا وهادي فرصة نوجدو فيها لكوب دافريك

عبر الناخب الوطني وليد الركراكي على الفرحة ديالو حيث المنتخب الوطني المغربي غيلعب الماتش ضد ليبيريا ضمن الجولة الاخيرة من اقصائيات كاس افريقيا، فمدينة اكادير غدا الجمعة، وعند الجمهور المغربي د سوس، واكد ان ليكيب ناسيونال خاصها تربح هذا الماتش وتوجد لكوب دافريك.
وتحدث وليد الركراكي فالندوة التي تسبق مباراة المغرب وليبيريا، وقال: "كنبغي نشكر الجامعة حيث غنلعبو فأكادير، من شحال هذا ما لعبنا هنا وغنشوفو جمهورنا فأكادير وناس سوس غدا التيران غيكون عامر باش يشجعونا وبغينا نربحو باش نساليو حنا الاولين فالكروب، ونرجعو فالنيوفو ديالنا ونوجدو مزيان لكاس افريقيا".
وأكد وليد الركراكي: "الماتش بحال ديما عندنا فالدار خاصنا نربحوه، غنلعبو مع واحد الفريق اللي حتى هي غتبغي تلعب مع المنتخب ديال دومي فينال كوب ديموند، غيعطيو الجهد ديالهم باش يدافعو مزيان ويعذبونا، وخاصنا ناقلو ليسوليسيون، وخدمنا مزيان هذه السيمانة باش نلقاو مفاتيح الرباح ديال هذا الماتش".