أكد الناخب الوطني وليد الركراكي أن ماتش المنتخب المغربي ضد جنوب إفريقيا فرصة بالنسبة ليكيب ناسيونال، باش توجد لكوب دافريك وأن الماتش غيكون عبارة عن مباراة ودية وخاص اللاعبين يتمتعو بها. وقال وليد الركراكي فالندوة الصحافية قبل ماتش المنتخب المغربي وجنوب إفريقيا: "غنجربو بعض اللاعبين باش نعرفو مستوياتهم والمهم عندنا هو نساليو إقصائيات كاس إفريقيا مزيان، ومنساوش بلي حنا فنهاية الموسم وعارفين أن بلي اللاعبين عياو وخاصهم عطلة وكاين فيهم اللي كيفرك فالميركاتو". وكمل وليد الركراكي: "دابا غنلعبو هذا الماتش ومن بعد غنرتاحو قبل ما يجي شهر سبتمبر اللي غتزاد فيه التحضيرات ونتمناو نكونو واجدين فكوب دافريك اللي باغيين ندوزوها مزيان ونديرو فيها نتائج مزيانة". وأكد الناخب الوطني: "عارفين بلي التيران غيكون عامر غدا فالماتش والجمهور حيث دابا جميع المنتخبات باغين يربحو المنتخب المغربي، كأس إفريقيا من أكبر المسابقات بالعالم واصعبها، وخاصك تكون واجد لكلشي والظروف الصعيبة والمهم عندنا هو نوجدو لهذا الشي". وختم الناخب الوطني وليد الركراكي: "الماتش ضد جنوب إفريقيا كنعتابرو أميكال وسمحو ليا، حيث خاصنا نتمتعو راه نقدرو نربحو ونخسرو ولكن المهم هو نكونو واجدين لاهم حاجة وهي كوب دافريك".
