البطولة: التواركة أزمو وجدة وخذاو الصدار.. تطوان واسفي سالاو تعادل والزمامرة فاقو وربحو برشيد

كيواصلو اتحاد التواركة العروض ديالهم القوية مع بداية هذا الموسم، وربحو ماتش اخر وهذه المرة كانت الضحية مولودية وجدة اللي بايين الموسم بشكل كارثي.
وسالا الماتش بين اتحاد تواركة ومولودية وجدة فمدينة وجدة مساء السبت، برسم الدورة 2 من البطولة الاحترافية بنتيجة 3 لواحد للرباطيين.
وخذاو اتحاد التواركة صدارة البطولة الاحترافية مع شباب السوالم، بعد هذا الرباح وهو الثاني على التوالي بعدما ربحو الزمامرة فالدورة 1، والفريق الرباطي عندو 6 النقاط، أما مولودية وجدة اللي خسرو الماتش الثاني على التوالي، كيحتلو المركز الاخير وعندهم 0 بوان.
ودائما مع الدورة 2 من البطولة الاحترافية وفنفس التوقيت، تعادل فريق المغرب التطواني مع اولمبيك اسفي زيرو لزيرو، وخذا كل واحد منهم نقطة واحدة، وهي اول نقطة للمغرب التطواني بعدما خسر الدورة الاولى مع الماص وكيحتل المركز 10، اما اسفي طلعو رصيدهم إلى 2 نقاط وكيختلو المركز 9، حيث كانو تعادلو فأول دورة مع حسنية أكادير.
وحقق فريق نهضة الزمامرة استفاقة مهمة خلال الدورة 2، وربح اليوم السبت بواحد لزيرو فالزمامرة، فريق يوسفية برشيد اللي بادي بدية خايبة، مع العلم ان الفريقين رجعو بجوج للقسم الاول هذا الموسم، وخذاو الدكاليين 3 بوان مهمة خلاتهم ينقزو من اخر الترتيب إلى المركز 8، وبقاو برشيد فالمركز الاخير.