التواركة بداو البطولة برباح مهم على الزمامرة اللي يالاه طالعين للقسم الاول

حقق اتحاد التواركة رباح مهم فأول ماتش له فهذا الموسم الرياضي الجديد، وقدر يربح نهضة الزمامرة اليوم السبت، برسم الدورة 1 من البطولة الاحترافية.
وسالا الماتش اللي تلعب اليوم السبت فتيران مولاي الحسن فالرباط، بين التواركة والزمامرة، لمصلحة الرباطيين بنتيجة 2 د الاهداف مقابل هدف واحد.
وماركا اهداف اتحاد التواركة كل من أيمن ديراني فالدقيقة 19، وأرتيست سيمون بيير فالدقيقة 21، أما هدف نهضة الزمامرة ماركاه المخضرم زكرياء حدراف في اللحظات الاخيرة من الماتش.
وبهذا الرباح خذاو اتحاد التواركة ثلاث نقاط مهمة بداو بها البطولة، اما نهضة الزمامرة اللي يالاه راجعين للقسم الاول بداو الموسم بنتيجة سلبية خاصهم بعوضوها فالماتشات الجايين.