4 لكوال تقتارحو على ريال مدريد لتعويض كورتوا.. الفريق الملكي فضل ياسين بونو وبدا فالمفاوضات

ولا الكول المغربي ياسين بونو مرشح بقوة للانتقال من إشبيلية الإسباني إلى الموطن ديالو ريال مدريد، لتعويض حارس المرمى البلجيكي تيبو كورتوا اللي تقطعو له ليكامو، وما بقاش غيحبس لمدة أشهر على الأقل.
وحسب موقع "فوت ميركاتو" المتخصص فصفقات اللاعبين والمدربين بأوروبا، فكاينين 4 ديال المرشحين محطوطين على الطبلة مسؤولي ريال مدريد، لتعويض تيبو كورتوا، هم كل من الكوستاريكي كايلور نافاس الحارس السابق للفريق واللي دابا مع باريس سان جيرمان الفرنسي، والإسباني ديفيد ديخيا حارس مانشستر يونايتد الإنجليزي، والفرنسي هوكو لوريس حارس توتنهام الإنجليزي.
وأما الرابع والأقرب حسب نفس المصدر، باش يحرس مرمى ريال مدريد فهو المغربي ياسين بونو كول إشبيلة الإسباني، وكشف الموقع أن ريال مدريد ديجا كان باغي يجيب ياسين بونو قبل ما يتوعت تيبو كورتوا، باش يكون حارس ثاني خلال الموسم الجاي، وبمجرد ما توعت الكول البلجيكي بداو مسؤولين ريال مدريد الاتصالات ديالهم مع المقربين من بونو لمناقشة الصفقة، مع العلم أن إشبيلة طالبين 20 مليون أورو للتنازل على الكول المغربي.