غيلعب الرجاء الرياضي بطولة كأس العرب بلا صبونسور يدير له الإشهار ويدخل له شوية الصرف، باش على الأقل يساهم به فحل مشكل المنع من الانتدابات باش يقدر يسجل اللاعبين الجداد ويزيد عليهم انتدابات أخرى خلال هذا الميركاتو، أو ينقص به شي بريمات اللي كيتسالهم اللاعبين الحاليين. اليوم بمدينة أبها السعودية، كشف الرجاء الرياضي رسميا على التوني للي غيلعب به وما فيه حتى إشهار، أي أن الفريق اللي المستشهرين كلهم كانوا كيحلمو يحطو علاماتهم التجارية على توني ديالو ولو غير برمز صغير، اليوم غيدخل البطولة العربية اللي فيها متابعة من فئة استهلاكية مهمة بلا مستشهر، يعني الدخل الوحيد اللي عندو من هذه البطولة هو يتأهل إلى الأدوار النهائية، مع العلم أن بطل المسابقة غيربح 6 المليون دولار والوصيف 2 المليون دولار، وراه المنافسة هذه المرة صعبة، حيث الفرق السعودية جايبين لاعبين كبار من أوروبا بحال كريستيانو رونالدو وكريم بنزيما، أما الرجاء راه مازال مضاربين يحلو الإرث اللي ترك لهم عزيز البدراوي الرئيس السابق ديال المنع من الانتدابات باش يقدرو يكونفوكيو اللاعبين الجداد للموسم الجاي، أما البطولة العربية فات عليها الفوت. الرجاء الرياضي كانوا غيسنيو مع صبونسور يديرو له إشهار فتوني الفريق خلال كاس العرب مقابل 200 مليون سنتيم، ولكن ما كتابش، وكان محمد بودريقة كشف قبل أيام أن الفريق جاه هذا العرض، وقبل من يوم واحد من التوقيع عليه، وقعت أحداث الشغب فالفينال د كاس العرش اللي لعبت الخضرا مع بركان، وهاد الإحداث خلات المستشهر يتراجع على توقيع العقد مع النادي. للإشارة فهاد النسخة الحالية من كأس العرب من المرات لقليلة اللي كيكون فيها توني الرجاء خاوي من الإشهار، وراه غيلعب الفريق الجمعة الجاي باللون الاخضر فأول ماتش له بالمسابقة، اللي غيكون ضد شباب بلوزداد الجزائري بمدينة أبها السعودية. محمد بودريقة والمكتب المديري اللي معه، تختلف معهم فتسيير النادي أو تتفق، راه كتلقاهم حسن بزاف من المكتب السابق اللي كان مترأسو عزيز البدراوي وراه حتى المقارنة ولات كتبان لا مجال لها عند بزاف الرجاويين، حيث بودريقة واللي معه كيقلبو على الفلوس وكيجيبوها من فم السبع بلاما يخرجو يبكيو ويتشكاو على الجمهور او يديرو الصينية، والنتيجة بدات كتبان حيث خلصو أغلب الأحكام اللي على النادي بسبب النزاعات، وآخرها ديال سند الورفلي ملي حط بودريقة 285 مليون وفك معه الجرة. الرجاء دابا مازال لهم غير ملف واحد لرفع المنع على النادي، وهو ديال صلاح الدين العلمي اللي حكمت له الفيفا بكثر من 400 مليون سنتيم، والمبلغ تزاد لأكثر من 500 مليون بسبب تأخر المكاتب السابقة في تسديدو، وراه بودريقة والمكتب ديالو خدامين كيقلبو يجيبو لفلوس ويعطيوها للاعب اللي رافض أنها تقسم لدفعات، وهذا الشي كامل وما بكاو ما شكاو وما خرجو دارو صينيه كيفما دار الرئيس السابق عزيز البدراوي، اللي كان خرج الصينية باش يجمع لفلوس من عند الجمهور وكان كل مرة يتشكى وفشل فحل مشاكل النادي.
