صومعة سيدي ربي

1-
عْلى سَلْك دْ التَّصْبِينْ
ها أنا مَصْلُوبْ
نْغوَّتْ
وَلا َبانتْ شِي نَجْمَه
ولا شِي ضايَه دْ المَا
بانتْ بْعِيدْ،
غِيرْ الصْدَا وْ لحْدِ ِيدْ
وْ لكْلاكْسُونْ،
غَوتت ، عَيّطْت فْ التِليفُونْ
شَيّرِِِِِِِِِِتْ
بْصُوتِي ...و بْ يدِيّا :
«هِيه.ْ.. هِيه.ْ..
ياللِّي لْهِيهْ
هَزْ عِينيكْ...شُوفْ فِيَّا
هَانَا،
كِ نخلة ْ مُولانا ... مَصْلُوبْ
فُوقْ السْطََح.... اللِّي بْلا مَرْطُوبْ
وْحْدايا،منْ جيهةْ لِمِينْ
فُوُقْ حْبلْ دْ التَّصبِين.... سَرْوالْ
و عْ الشْمال، كَبُّوط ْ
بْحالِي مقبُوط ْ....للْسًّلك ْ
هِيهْ ...هِيه.ْ..
يا اللِّي لِهيه.ْ.. «
نغوّتْ
وْ يَرْجعْ الصُّوتْ
فَرّادِي... وْ يْموُتْ
بِين إيدِيّا
وَلاَ حَد ْ... هَزْ عِينُو فِيّا
و قال: أشْ كاينْ...؟
وْهانا كَنْعايِنْ
تد?وزْ شِي ريحْ
بْكْفوُفْها دْ الشِّيحْ
ترمِيني لْتُوبقالْ
أوْلا، فو?قْ دُوُكْ الجْبالْ
اللِّي لْهيِهْ...مَالَتْ
جَنبْ نَخْلة تافِيلالتْ
نْطِيح.ْ.. واقفْ كِ صومْعة سِيِدي ربِّي
بْحا ل ْ اللاّ... عالْيَه وْ تْعلِّي
وأنا فوُقْ السّلْك مْدَلِّي...
2-
عْلى سَلْك د ْ التّصْبينْ ،فوُق سْطَح بَرَّانِي ، يَجْرِيوْ فِيه لقْطُوط ْ
رانِي للسّلْك مَرْبُوط ْ
مَنْشُورْ
وْ الخَاطرْ مكْسُورْ
مَاجاتْ رِيحْ... وَ لاَ جَايْحَه كَحْلاَ
تهزْنِي ، ترمِيني لْشِي خْلاَ
وْسَا دْتي، ضْفِيره مْ الشَّمْسْ ، وْخِيطْها اللَّوْلانِي
توَشْوِيشْ المُوقْنِينْ
حْزامْ للاّ فاطِمة الزّهْرا
ريحة ْ الكَمُونْ
AGENDA بْ أرقامْ تِلفُونْ
اللِّّي قراوْا مْعايا « قلْ أوُحِيَا»
و تهجّينا جْمِيعْ
صُوتْ بُوجْميعْ
فْ الصّينية
وسادتِي ،حُومْتي و اللّي لِياّ
طَلّيتْ
كَانْ السُّورْ
قبرْ و يَاجُورْ
وْ مسَامرْ
وْ كانْ لخْوا
وْ بيَّاعِين الرّغْوَهْ
وْ المُوتْ
تّاواوْ
مْع العنْكبُوتْ... و تْخاواوْ
تدفنّي فْ عُشْها
كَانتْ عتْبة اللِّيلْ ،حالّة كَرشْها
و لكْلاكْسُونْ
طُوط.ْ.. طُوط..ْ.طُوط ْ
و أنا
الفُوقْ مرْبُوط ْ
بْحالْ شِي بَطلْ خُرافِي
تْسنِيتْ يدْ الله ...تْجيبْ لِي نِسْكافِي
تْمّنيتْ مْ المَا ...جَغْمهْ
تمنّيتْ مْ السْما....نَجْمهْ
تشهّيتْ طَجِينْ بْ اللْحم ْمقلِّي
و أنا
منْ فُوقْ السلْكْ مدلِّي...