هو اعطى.. ولي اقبط ولى في جيبه.. عمرو ليه الجياب.. تنفخو ضن راسو اسمان، ونفخ ريشو.. أو في باب دارنا كيحط سيارتو.. تهضر معاه يندمك.. ويسمعك المنقي من خيارو.. الكلمة الطيبة ماساكناش في دوارو.. ينهض فيك.. ويقولك هذا مكان عمومي.. والي ماعجبو حال يسطح راسو مع الحيط، نسى مول قهوة جنان الكرمة، بأنه هو مستولي على الملك العمومي اللي فارع لينا بيه راسنا.. مول جنان الكرمة مخترق القانون ومستولي على الملك العمومي ديال حي يعقوب المنصور وعادي جداااا... خويا الله يرحمو، يحساب ليه كاين القانون امشى عند القايد، حتى ياخذ لو حقو، اضحك عليه بسير وآجي، مرضو في قلبه وامشى تاني لعند الباشا، لقى جمعيات مدنية مرشية ؛ سانية مع المنفوخ على عمالو امشى للعمالة؛ الله يرحمه قالو له، ما عندهاش حق، ماشي اختصاصنا، أو ماعملو والو.. خويا الله يرحمو، مات يوم 19 06 2014 وأنا هاد العمود غادي نولي نكتب فيه كل خميس من بعد رمضان إن شاء الله؛ والآن كيحضرني زجل كتبتو في الألفين سميته ''داك الحق'' كانهديه لكل الضمائر الحية ولقراء جريدتنا الغراء ''العلم''.. ''داك الحق'' داك الحق فين راه ساح.. شد الرحال بات ما اصبح؟! مول المليح باع أو راح.. مول الحق مشى ساح بين فيافي وبطاح.. شكى، بكى، صاح.. ولا احد اسمع النواح.. والباطل بين دوالي مرتاح.. البال هاني امسى وصباح.. ديما ضاحك مع صحابه الملاح.. حيث إلي في المال ملحاح.. ماشكى.. مابكى..؛ ما قال آح... وفآخر القول.. الرشوة مازال كتدور.. في بلاد ألا قانون كتدور.. وفي عصر تحرير الملك العمومي كاتدور.. وفي عصر الإخوان كتدور...