عطوني حتى انا ڭريمة???!!!!

عطوني حتى انا ڭريمة
راه لا قراية لا خديمة
كتصير علي غير الميمة
بغيت نعيش ونوكل مراتي حليمة
********
نهار كامل وانا كنخمم
الجيب ما فيه حتى درهم
لساني بالبطالة كيتكلم
غارق في المشاكل والهم
********
عرام
عندي انا فرقة كرة القدم
الصريط والمريط ياكلوا حتى العظام
خلوني ساكت مبقايت قادر على الكلام
********
عطوني أنا لي زهري معكس
غرقت كريدي وملقايت باش نخلص
مرارتي غاديا تفرقع راني مفقس
مال زهري مالو مبوص???!!!
********
حنا يا ما حسدنا حد
غير انا طلعت لي السخانة واش كاين الصهد?
لي يستاهل كاين لي مات كاين لي مرض
ايوا عطوني أنا لي معندي صحة ماعندي جهد!!!

محمد لبزيز(اسفي)