صنطيحة واشمن صنطيحة !!!!

بقلم الزجال المسفيوي محمد لبزيز
عندي صنطيحة واشمن صنطيحة
بحال الصفية شحال صحيحة
ديما خاشي راسي نشمشم على الريحة
ِنموت على الفلوس ونموت على الترفيحة
***********
فيما مشيتي انا تلقاني
انا مخلوض والعين تابعاني
وجهي قاصح وشطارتي في لساني
هدا هو حالي ولي في ما هنانيي
**********
عزيز علي نتملق وشرفي ما يهمنيش
عزيز علي نسرق ونتعدى على الدرويش
على القناعة والصدق انا مامربيش
حرام ولا حلال المهم باغي غير نعيش
*********
معندي ضمير مايهمنيش كلام الناس
انا صكع مصنكع ما عندي إحساس
ميهمنيش نخدم بلادي ما وقع والو كلشي لاباس
المهم نكون رابح هدا هو الأساس
*******
بغيت نعمر أنا الشكارة
ناكل اللحم والدجاج والفقير نعطيه البصارة
نعيش ونتمتع في هاد الدنيا الغدارة
مكرهتش ناخد كلشي ولكن يا خسارة
********
الله الله يا ناس سمحوا لي راني عليكم تعديت
معمرني شفت النعاس وختا عندي كل ما تمنيت
تقالت علي كرشي وعلى المشيان مبقايت قديت
نستاهل انا لي طمعت ووسخ الدنيا هو لي بغيت