ما كيناش الراحة.. الوداد راجعين يتدربو من بعد رباح مهم وكيوجدو لماتش بيترو أتلتيكو المصيري فالعصبة

غيبدا الوداد الرياضي يوجد من اليوم لماتش الفريق ضد بيترو أتلتيكو الأونكولي فالجولة الثالثة من لكيروب ديال عصبة أبطال إفريقيا لكرة القدم، باش يتدارك الخسارة فالماتش الماضي مع شبيبة القبائل الجزائري.
اللاعبين ديال الوداد الرياضي واللي راجعين برباح من الجديدة فالبطولة غيرجعو للتداريب اليوم الأربعاء، وعندهم حصة تدريبية غيخدم معهم خلالها المدرب المهدي النفتي والطاقم التقني اللي معاه باش يحيد عليهم عيا ماتش البارح ويرفع من لافريشور فيزيك ديالهم ويحافظ على لمورال طالع وسط لكروب من بعدما جاب الفريق 3 بوان مهمة، وهادشي استعدادا لمواجهة بيترو أتلتيكو الانكولي الجمعة المقبل فستاد دونور.
وغيستقبل الوداد الرياضي فريق بيترو أتلتيكو الأونكولي الجمعة المقبل فالجولة الثالثة من لكيروب ديال عصبة أبطال إفريقيا وهي مباراة مصيرية بالنسبة للفريق الأحمر باش يصحح طريقو فالمسابقة، وأيضا مصيرية بالنسبة للمدرب المهدي النفتي اللي صبح مهدد بالإقالة فأي وقت.