بعدما تأهلوا فكأس العرش.. الوداد بداو كيوجدو لشبيبة القبائل فالعصبة

بدا كيفكر الوداد الرياضي فعصبة أبطال إفريقيا وهو اللقب اللي غينطلق فالدفاع عليه إبتداء من ماتش شيببة القبائل الأسبوع الجاي، وهادشي من بعدما ضمنت الحمرا التأهل ديالها لثمن نهائي كأس العرش البارح ملي ربحت المغرب التطواني بضربات الترجيح فتطوان.
مدرب الوداد الرياضي المهدي النفتي منح اللاعبين يوم غد الأحد عطلة باش يرتاحو من لعيا ديال ماتش تطوان فكأس العرش البارح الجمعة، ونهار الاثنين الجاي غيبدا يوجد معهم للماتش ديال شبيبة القبائل فالجولة الأولى من دور مجموعات عصبة أبطال إفريقيا.
وكيعمل المهدي النفتي هو والطاقم التقني ديالو على إعداد اللاعبين ديال الوداد بدنيا ونفسيا، واستغلال التأهل فكأس العرش باش يرفع من معنويات اللاعبين يفتتح الفريق مرحلة ليكروب بنتجية إيجابية فالقبايل.
ومن المنتظر يسافر الوداد الرياضي فرحلة جوية غير مباشرة من مطار الدار البيضاء الدولي عبر مطار تونس ثم الجزائري، باش يلعب مع شبيبة القبائل فتيزي وزو، حيث السلطات الجزائرية غالقة الأجواء الجوية ديالها على الطائرات المغربية.