الوداد راجع يتدرب وباغي يربح تطوان فكأس العرش وينسي الوداديين فصدمة الإقصاء من الموندياليتو

غيرجع الوداد الرياضي لأجواء التدريب وغيركز على الماتش ديالو الجاي ضد المغرب التطواني فكاس العرش، من بعدما تقصات الحمرا من كأس العالم للأندية السبت اللي فات فالرباط.
الوداد غيطوي الصفحة ديال المشاركة الكارثية فكاس العالم للأندية والخروج من ربع النهائي على يد الهلال السعودي وسط المغرب وقدام الجماهير المغربية والودادية، وغيبدا يوجد المغرب التطواني من بعدما كانت الأحلام ديال الوداديين يوصلو للفينال على الأقل.
وغيدير الوداد بقيادة المدرب المهدي النفتي حصة تدريبية اليوم فتيران بنجلون، وهي الأولى من بعد الإقصاء من الموندياليتو، وغيركز فيها النفتي والطاقم اللي معاه على استرجاع اللياقة البدنية ديال اللاعبين وتلطيف الأجواء والرفع من المعنويات اللي طايحة.
الوداد الرياضي غيكون ضيف على المغرب التطواني الجمعة الجاي فسدس عشر نهائي كأس العرش، فانتظار تحديد التيران اللي غيتلعب فيه الماتش ومعاش غيبدا بالضبط اللقاء.