ثلاثي ودادي قريب يرجع للفرقة والحمرا كتوجدهم لكأس العالم ديال الأندية

قرب ثلاثي مهم فالوداد الرياضي يرجع يلعب مع الحمرا فالأيام اللي جايا، وهادشي من بعدما بعدو على ليماتش مؤخرا بسبب الإصابات.
وبدا كل من زهير المترجي والسنغالي صامبو جونيور والجزائري الحسين بنعيادة فبروكرام خاص بالتنسيق ما بين الطاقم الطبي ديال الوداد والطاقم التقني، وخدامين الطاقمين بزوج باش يرجعو اللاعبين بثلاثة فوقت قريب ويوجدوهم لكأس العالم للأندية، واخا الإصابات اللي جاتهم ماكانتش ساهلة، حيث فيهم اللي مضروب فليكامون واللي كان مهرس، ودابا راهم بداو كيديرو تمارين انفرادية وبعدها غادي يدخلو يتدربو مع الكروب الأيام الجايا.
للإشارة فالوداد الرياضي غيدخل الأيام المقبلة فمعسكر إعدادي بمركز محمد السادس لكرة القدم بالمعمورة، باش يبدا يستعد لكأس العالم للأندية بالمغرب، وغيلعب فالماتش الأول ديالها فربع النهائي يوم 4 فبراير المقبل مع الهلال السعودي وفحالة تأهل غادي يواجه فنصف النهائي مع فلامينكو البرازيلي.