سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
فضيحة. مافيا المقالع لي كتسرق البلاد غلبات البرلمان.. مكتب مجلس النواب رفض المهمة الاستطلاعية على هاد المافيا ومصدر فالأغلبية ل"كود": قرار مكتب الطالبي خاطئ وغانضغطو باش نفضحو هاد الشفارة
مكتب مجلس النواب دار قرار لبارح غير مفهوم بالنسبة لعدد من البرلمانيين، فاش رفض طلب تشكيل المهمة الاستطلاعية حول المقالع تقدم به الفريق الاشتراكي. هادشي كيفكر فالولاية السابقة، فاش تدخلت مافيا المقالع وفشلت المهمة الاستطلاعية على المقالع، ونجحات تضعط باش التقرير النهائي ما يخرجش نظرا للتلاعبات الخطيرة لي وقفو عليها البرلمانيين واللي منها طبعا تورط عاين باين ومفروش لمسؤولين فوزارة التجهيز مع رؤساء جماعات ومسؤولي السلطات المحلية، فتهريب الملايير اللي كيربحو هاد المافيا من المقالع. الطلب لي قدم الاتحاد الاشتراكي بمجلس النواب بتشكيل مهمة استطلاعية مؤقتة حول مقالع الرمال والرخام، دبا ترفض ولكن مصادر فالأغلبية استغربت من قرار مكتب الطالبي العلمي. مصدر فالأغلبية قال ل"كود" بلي قرار مكتب الطالبي العلمي غير موفق، وغادي نضغطو باش يتم تشكيل هاد المهمة الاستطلاعية، مشيرة بلي قطاع المقالع فيه فوضى وتهريب الملايير اللي كاضر باقتصاد بلادنا، مشددا بلي سيدنا قال خص تعبئة جميع الموارد المالية باش نجحو برامج الحماية الاجتماعية وميمكنش دبا نسمحو لمافيا كتسرق البلاد. دبا غير يقولو لينا علاش ما خرجش التقرير السابق وشكون تلاعب وبلوكا هاد المهمة، كيفما بلوكا المهمة الاستطلاعية حول الدقيق المدعم وغيرها. قطاع المقالع من مصادر الثروة فهاد البلاد، لللي كيعرف يخلوض فيه كيدير فلوس دغيا وطبعا كولشي كيدير معه لباس من سلطات ومسؤولين ومهندسين.
